其實三年前我地出版個本《不是土地供應：香港土地問題的迷思與真象》既時候，除左分析香港其實真正個問題源於土地壟斷而非單純土地供應，其實第三章提到一個好少人講，但係今天已經變成政府《香港2030+》既重要概念——土地儲備（Land Reserve）。今日同大家重讀一下。
理論上香港9成9土地都係屬於政府擁有，大量未有使用及出售土既地都係屬於官地，本身就已經有龐大既政府土地儲備。但依家政府提出既新土地儲備觀念唔係咁諗，佢諗緊係我可以造定一大堆唔發展著既地做儲備，定未來睇下有冇需要先再諗用黎發展做乜，如果係咁諗儲備就將會好大問題。
試諗下，情況就如有個本身自己已經有好多銀既富翁問你借錢。咁你正常都會問番佢：「你借錢黎做咩呀」，佢答番你「我借黎儲囉，都係為左你。」依家政府同香港市民搶綠化環境、拆你家園同農地，然後問佢收黎做乜，佢竟然可以借「建立土地儲備」之名咁同你講，話收你間屋係用黎儲既，你會唔會覺得好荒謬？
同埋一旦俾佢呢個「土地儲備」既概念0係《香港2030+》過左骨，佢就可以借公共利益既名義見神殺神，遇佛殺佛。想收你塊地就唔駛解釋佢之後用黎做乜，直接就話係「土地儲備」儲著先，都係為大家好，變左政府可以更進一步實行土地行政霸權。
其實惡夢已經出現，《香港2030+》依家透過高估人口假設到900萬（實際香港去到2041年最高峰只有822萬），然後話未來需要擴張多20%城市面積（4800公頃），話就算最尾搶番黎既土地預多左，咁咪幫大家儲著先囉，但係我地既環境、家園同邊境就已經俾佢破壞左。
這個土地儲備概念實為整份規劃文件中最為危險的概念，各位不可不察。