點解咁在乎公民提名］首先講一講個開價先 —任何人攞到某個數量（let’s say 1%）嘅公民提名（指街站攞實體提名，同立選嘅提名一樣），我就會俾果一票提名俾佢。無論係葉劉／曾俊華，甚至梁振英陳雲都好，照俾不誤。
咁如果無人呢？暫時諗果票提名票係射落海。唔係因為我鍾意射落海，而係咁開價先有意義。
當然你可以話我自high，開到咁高邊有人做到。無所謂。由參選區會開始，大把嘢俾人批評異想天開，多一樣唔多。
而如果大家有聽長毛訪問嘅，我其實同佢諗法有少少唔同。我完全唔在乎整個特首選舉入面有無民主聲音，有無民主派俾我揀。
真係個個都揀唔落嘅時候，我試得投白票㗎。我無任何包袱話乜建制一定唔揀得。秋香效應我明，而曾俊華觸唔觸及到我條底線，真係要到投果日先可以好肯定咁答到你。
咁點解日日提公民提名？係因為我唔想「公民提名」呢樣嘢，變咗「建設民主中國」咁，成為咗一句口號。我希望兩年前我哋堅持嘅嘢，係可以透過行動去實踐。
香港呢幾年嘅政治生態係吹嘅多，做嘅少。而我相信只有實踐，先可以話到俾所有人聽你支持嘅理念係啲咩嘅一回事，先可以落地。而點解我反感戴耀庭嘅提名，係因為佢混淆咗市民，究竟我哋係已經有公民提名丫，定還是我哋依然爭取緊呢一樣嘢。
我其實唔在乎薯片對奶媽，定還是係狼對豬。我在乎嘅係作為雨傘革命嘅延續，我哋究竟有無足夠嘅勇氣去實行我哋兩年前堅持嘅方案。呢個實踐，與其話係參選，不如話呢個係一個抗爭。一個用行動將我哋兩年前嘅主張實現嘅抗爭。而當提名呢個階段完咗，無論你揀lesser evil 又好，誓死投白票又好，悉隨尊便。而我更希望嘅，如果你係相信公民提名嘅候選人，唔好等某個apps 去幫你，而係用你嘅誠意，依正規矩跟足手續去做。
我好清楚毛哥唔係一個好嘅選擇。口才唔好，而且佢出選會令個問題失哂焦。佢出賣咗自己呢十幾年嚟嘅政治立場。但公民提名本身就係唔介意你個人係乜立場乜能力，只要夠支持就ok。如果真係攞到足夠提名，我果票提名俾佢係一分猶豫都唔會有。
因為我好清楚呢兩年我係為乜走出嚟。
至於最後點投，我相信大家有足夠智慧去揀。亦都歡迎大家嚟我fb 一齊討論。
最後講一講鎅票論。我覺得無謂鬧，因為係呢個制度之下無乜得鎅票嘅可能。
無．論．如．何．候．選．人．要．有．6．0．1．票．先．會．贏。
如果林鄭有601 票，有無長毛都會贏。如果林鄭無601 票，長毛會喺第一輪投票俾人淘汰，之後淨返果兩個隻抽。
你話「唔係喎，鎅咗啲提名票喎。」呢個係啱嘅，但如果曾俊華連一百票建制提名票都攞唔到（我當仲有五十票非建制票會提名佢），大家無謂FF 曾俊華會贏，疊埋心水移民去阿魯阿圖啦。