話說觀塘有條街叫功樂道，由觀塘市中心直上半山，半山上大部份都係私樓。
成個區都係住宅，無巴士，街坊出入一係靠小巴，一係就自己行斜路或者一條超過一百級嘅樓梯。所以你喺放工時間經過裕民坊會見到一條一條嘅人龍，等超過半個鐘小巴返屋企。
十幾年前有個區議員話爭取起電梯，佢話要喺原有嘅樓梯度起部lift 出嚟，條樓梯寬度唔過十米，左右兩邊都係私人屋苑，起有難度，業權管理都有難度，我都唔知佢係咪當打機兩秒就可以變部lift 出嚟。
結果拖拖拉拉搞咗十幾年，區議員屆屆都攞個起lift topic 出嚟，一路贏區選但一直都起唔到，街坊就日日都要捱小巴。
十幾年後終於有個正常人行出嚟「喂，點解唔越過個屋苑喺隔離個公園仔度起？」
所有問題突然迎刃而解，無技術問題無業權問題，由地鐵站行返屋企嘅時間由三十分鐘變成十分鐘。唯一問題係阿區議員嘅面子問題，區議員話「我堅持要原本個方案。」
好彩路政署都唔係白痴，邊個方案好啲一睇就知，政府最終決定用正常人方案。
而今日我哋見到嘅係呢個banner。
佢好意思攞人哋個idea 出嚟講。
同埋我真係好想問一句，你要搵人找數嘅話，你幾時為浪費咗街坊咁多光陰找數？