雖然有點遲，但希望都幫到手。除咗第一條之外其他排名不分先後。
1. 最重要嘅rule！如果你對美學唔係有乜專業嘅話，相信你嘅designer。你負責嘅只有內容。
2. 執正啲。人敬衣裝係無錯嘅。唔洗一定套裝咁出嚟，但要適合你嘅身份同埋醒目，仲要高辨識度。唔好堅持乜乜柒柒點舒服啲點平時唔係咁，問多幾個朋友嘅意見。信我，到你輸少少果時會極度後悔。
3. 禮貌！禮貌！禮貌！派嘢嘅時候躹個躬對住街坊講多一句會增加成功率。"小姐早晨，係關於下面條樓梯嘅。"
4. 大聲啲有朝氣啲唔好怕醜！最樣衰嘅你已經做咗出嚟，大家以後google 你個名就知你幾多票。唯一令自己唔好更樣衰嘅方法就係努力做好啲成績。
5. 如果有啲好支持嘅街坊，唔好怕醜一定要問佢可唔可以平時/選舉日幫手拉票。你叫得郁一個街坊，可能最終嚟幫手嘅仲有佢屋企人。隔離屋個師奶都支持其實對一般人嚟講好有說服力。講多次，你想像唔到輸少少嘅時候你會幾懊悔自己喺啲小環節度有無做得好啲。
6. 對義工好啲。多啲互動唔好當人condom。大家唔係複製人一定有啲意見係唔同，點樣去平衡各方再去俾個大家都接受嘅解決辦法係區議員嘅工作。我明選得嘅都係痴線佬都係有返咁上下堅持嘅人，但你唔只係嚟講理念，而係要用唔同方法令其他人接受同認同你嘅理念。
7. 唔好quit group，無人有責任氹返你。
8. 街站唔一定剩係擺最多人嘅地方同時間。有時成條街唔多人都見到你個衝擊仲大。大家都廢青擺晨早係好痛苦我好明白，反其道而行我試過擺到凌晨嚇到啲放工嘅叔叔嬸嬸。"因為呢個時間先撞到你" 真係冧哂。
9. 食完飯散步、溜狗係一個好時間，大家會好得閒聽你廢up。
10. 唔好寫啲講啲自己都唔信嘅嘢。唔好當街坊白痴，你唔係專業講大話嘅話，誠實定吹水其實好容易睇得出。
11. 街站附近污糟嘅，花少少時間清理佢。如果有街坊見到你清理會有奇效(不過唔洗太造作，有就有無就無)。相反喺一個污糟地方擺兩個鐘都唔搞搞佢感覺其實有點差。
12. 點票！點票！輸少少記得點票。99 票睇落好多但其實只係50 張票擺咗去隔離。無乜特別作用但可以死得心甘命抵
暫時諗到係咁多。谷一個月就得其實比起上屆好好多，光復香港靠各位勇者啦！