兩年前港大「眀峯」與「Smarties」對決，令學生會的政見備受關注。從此每屆選期，筆者會盡力走訪各大院校的候選內閣，詢問「政治必答題」。
＊＊＊
問：你地點睇六四？
睿鳴：我地嘅立場同評議會嘅議案一樣。會同往年一樣，係六四舉辦相關論壇。
＊＊＊
問：你地點睇中共？
睿鳴：我地唔承認依個政權，所以我地唔會話回歸，而係主權轉移。係政治現實上佢的確係主權國，但我地唔會承認。
＊＊＊
問：你地點睇香港嘅政治前途？
睿鳴：而家好多人批評當年選擇民主回歸，放棄左香港好多可能。但從當年處境睇番，香港人可能覺得民主回歸係對佢地最好。
但由而家處境去睇，我覺得必然要脫離中共嘅一國兩制、基本法框架。
如果我地成功當選，都想俾多啲資訊大家，唔一定關於獨立，而係香港同中國有其他可能。假設聽日有一個公投俾大家決定，起碼大家有一個知情嘅決定。
問：外間有說你們是「港獨莊」，你們的政治願景是怎樣？
如果廣泛地講，我地希望香港人，終有一日可以決定到自己依個地方，有真正嘅民主。政府唔符合大家期望，可以輪替政府。
如果逐一評論，港獨可以脫離基本法框架，的確係可以考慮嘅選項之一；
相反就係繼續留喺基本法，未必唔可行，但前提建基於相信中共。睇番 track record 就知，中共唔係值得信任嘅對象，現階段留係中共體制唔係最可行；
至於歸英或歸台，都係追溯番南京條約，但依個係頗為模糊嘅問題，必須要面對建基於乜嘢去講。
＊＊＊
問：如貴閣有幸當選，會主張以什麼形式抗爭？和平抑或勇武？有沒有被捕的準備？
睿鳴：以馮敬恩為例，佢唔係一夜就可以圍堵校委會，係經過聯署、靜坐等等。
我地唔會話特登行邊條路線，話邊啲路線一定唔會行。都係睇番當時情形決定做啲乜嘢。
我地嘅抗爭底線，係唔希望主動使用武力。但如果走到前線，真係會發生肢體抗爭，最基本係保護到學生。
而家參與抗爭嘅成本愈來愈高。好坦白講，我地全莊幹事都已經有被捕準備。