早前斐濟足總考慮征召傑志球員林恩許入斐濟國家隊，但今日有香港媒體引述佢說話指「否認代表斐濟讚揚香港球壇更專業」，並話「小時我曾在澳洲球會出戰過大洋洲聯賽冠軍盃，當時我和斐濟隊交手便感到他們很業餘，到大國腳甚至會由正職為司機、教師等球員出賽。老實說香港比他們專業多了」。
林恩許講嘅是否冇錯？斐濟男足近年登上過國際舞台，先講講大細國腳。
斐濟男足近年打入過FIFA U20世界盃決賽週及2016巴西奧運足球決賽週，不過2次打入決賽週都係冇大洋洲勁旅新西蘭喺到，因為新西蘭主辦FIFA U20世界盃所以唔使踢外圍賽，而2015年太平洋運動會足球賽奪得金牌國家會成為大洋區奧運足球唯一代表，結果新西蘭U23於4強被揭發用違規球員被取消資格，最終金牌戰中斐濟U23擊退瓦努阿圖U23取得奧運入場券。
冇新西蘭阻住成為斐濟近年2次亮相大賽原因，不過23歲以下足球發展唔計新西蘭，斐濟都算大洋洲內進步得比較快嘅一支隊伍，但成人隊成積就一般，上年舉行嘅大洋洲國家盃小組賽雖然不敵新西蘭，但隨後1比0小勝實力相若嘅所羅門群島，可惜最後因為後防大意輸畀瓦努阿圖出局，而睇返歷屆大洋洲國家盃，斐濟從未奪冠，最叻只係季軍，近3屆都係小組出局。
再講專業，其實香港足球都唔算專業，但的確係比斐濟專業。
斐濟冇職業足球聯賽，但足運喺當地並非毫無地位，現時多支斐濟業餘足球聯賽早於上世紀30年代成立，例如 Lautoka FC就係喺1934年成立，咁係因為受到英國殖民時影響，而最具歷史係 Rewa FC，1928年就成立，係斐濟國家足球聯賽中少數有請職業外援嘅球隊，今季為咗備戰大洋洲球會盃一口氣簽咗4位外援，包括喺伊朗踢過幾季職業足球聯賽嘅巴西中堅 Diego Galvao。
今年初斐濟當地消息指斐濟足總計劃於2020年之前推出一個完全職業嘅斐濟國內聯賽，斐濟足總首席執行官 Mohammed Yusuf 指會鼓勵斐濟商業機構投資聯賽，並設立電視直播加強宣傳，而今年Vodafone（沃達豐集團）繼續成為斐濟聯賽最大讚助商，更名為Vodafone Premier League。
雖然有少量職業外援登陸，亦有商業機構投資，討論亦增加，但本土球員幾乎仲係以業餘為主，若果計全職業足球員相信斐濟只有一位，佢就係踢緊Wellington Phoenix嘅Roy Krishna，眼見所羅門群島、巴布亞新畿內亞及瓦努阿圖等競爭對手不停進步，斐濟都唔可以再停留喺一個階段喇。現時睇，斐濟足球係冇香港咁專業，但之後？唔知咯。