呢幾日幾乎全球各地嘅主流／非主流媒體都有報道前日印尼甲組聯賽Persela Lamongan（佩西拉）對Semen Padang（巴東）嘅比賽，當然唔係講佩西拉點樣贏巴東續漸擺脫降班漩渦，而係講佩西拉門神Choirul Huda因為喺比賽中同隊友發生碰撞而死亡呢單悲劇，呢單悲劇喺呢幾日都係印尼當地最熱門嘅話題，但悲劇發生後聯賽都要繼續踢，所以唔少印尼體育媒體都將焦點放返去聯賽到，尋日就有場「阿二」大戰，由排尾二嘅Persiba Balikpapan（佩斯巴）主場對排第二嘅Bali United（峇里聯），主隊護級要分，客隊要爭冠軍都係要分，牌面上峇里聯係比佩斯巴強，睇近況都係，但結局振奮人心，佩斯巴以3比2戲劇性反勝。
一開波峇里聯就反客為主積極搶攻，不過初段腳風唔順，兩位荷蘭強鋒Nick van der Velden同Sylvano Comvalius都浪費大好機會，反而受壓嘅佩斯巴反擊唔多但非常有效，即使近排非常fit嘅南華棄將勞域捷浪費咗兩個機會，但佩斯巴都憑峇里聯門將I Made Wardana出迎時甩手由Sunarto執雞先開紀錄，上半場佩斯巴領先一球返更衣室。
下半場開始冇耐峇里聯重金由荷蘭聯賽抆返嚟嘅印尼國腳Stefano Lilipaly整個炮彈遠射幫球隊追返，畀人追返後輪到佩斯巴心急，後防突然非常性感，益晒峇里聯，話咁快Sylvano Comvalius頭鎚二傳畀Irfan Bachdim挑入反超，之後就進入死拖時間，反正峇里聯只要三分，不過激動人心嘅事喺完場前發生，勞域捷射罰球省中人但隊友Yudi Khoerudin補中為佩斯巴追成二比二，全場萬二名球迷嗌到拆天，到補時93分鐘峇里聯門將I Made Wardana低級犯錯益晒埋伏喺前面嘅Bijahil Chalwa，為佩斯巴反超三比二完場，拎到寶貴三分。
協助佩斯巴神奇絕殺嘅前鋒Bijahil Chalwa，其實就係當年'「佩斯寶十二勇士'」之一員，佢係當時佩斯寶最好波嘅本土球員，離開佩斯寶後效力過Persela Lamongan（佩西拉），同隊中大哥Choirul Huda非常熟，所以入波後佢立即喺場邊拎起Huda嘅波衫向呢位前輩致敬。