好多人好奇《地厚天高》係咩樣。佢只喺灣仔藝術中心放映，場場加映都搶購一空。事關場數少，咁神心搶到飛，都好難唔係梁天琦忠實擁躉。相關嘅影評好兩極化：一係句句好評，過度解讀（例如梁天琦食煙噴啲煙霧，都係象徵乜乜乜），實則借電影抒發梁天琦嘅故事抒發感嘆，而無論到電影本身；又有人一味劣評——長篇大論後，原來無買飛入場，只係借機表達對梁一走了之嘅不滿。筆者雖然唔係梁粉，恰巧路過灣仔時，朋友因病讓飛，咁就因緣際會睇咗套戲，算喺觀眾中比較抽離嘅，可以以戲論戲，向未入場嘅你畀返個中肯影評。
導演林子穎啱啱喺港大畢業，之前已經導過《旺角黑夜》同《未竟之路》，對相關題材駕輕就熟，並且早就識得同屬港大嘅梁天琦。所以入手角度同《未竟之路》，一樣咁貼地、年青、「企得前」。唔同嘅係，今次人物單一，追蹤時間更長，事件更具體。顯然因為導演同梁天琦都係朋友，當訪問到屢受打壓嘅梁天琦，尤其好多當時無法公諸於世嘅感受，都向導演坦白道出。而紀錄一個立法會參選人被DQ前後嘅幕後辛酸，都幾貼身、真實。
不過導演始終年輕，有如好多學生作品，呢套戲嘅新手錯誤都唔少，甚至可以用「暇可掩瑜」去形容。字幕超出畫面，聲音有時過大，都好影響觀賞嘅興緻。導演發問到喉唔到肺，無意義嘅問題，例如「結他上面呢舊嘢（變調夾）」，真係可免則免。電影時常都用字幕交代事情發展，但大大隻都幾阻畫面。而且好多本人嘅訪問反而都唔顯示受訪時間，令人唔知講緊係邊一刻嘅心路歷程。街景畫面本來饒有玩味，但喺影片實在太多太長，令人不勝其煩。反而一啲外界好奇嘅要點，例如梁天琦點睇梁頌恆宣誓玩嘢失敗，點樣看待群眾同香港社運，反為缺乏有深度嘅探究，都幾可惜。
鏡頭方面，其他社運紀錄片用全景，影晒成個人，咁就影到人物同其他人互動關係，同埋人物喺個大環境之中嘅角色。地厚天高運用咗大量嘅特寫同過肩鏡，正如導演同梁天琦嘅朋友，大大個梁天琦人頭喺銀幕之上，好似個朋友咁同你講嘢。呢個攝影角度喺社運紀錄片中尤為難得，都好反映到佢同港大朋友、本土民主前線之間嘅兄弟情。
雖然電影提到梁天琦嘅抑鬱同無力感，但無用到好慘情嘅背景音樂。相反，用海洋、高樓、食煙呢啲畫面去描繪，都幾有意思。而前線嘅影片同梁天琦嘅訪談交雜，令人感觸良多，呢啲都係好有趣嘅嘗試。不過三首插曲，其中兩首用普通話，又要望字幕又要望畫面，教人應接不暇。最後梁天琦唱Beyond嘅《十八》，本來幾動人，但偏偏插入幕後花絮同講話。內容多寡嘅平衡，導演應該攞得再好啲。
總而言之，喺紀錄片嚟講，呢套戲嘅取材角度真係屈機，無奈捉到鹿唔識脫角，林導演嘅發揮未如人意，就好似一塊煎得太生，甚至bloody rare嘅和牛，鍾意和牛嘅人照樣鍾意，但對一般人都係難啲入口。不過，連字幕都未搞好，影意志都係唔好咁Chur要想攞金像獎喇。