立即捐款

生活

有乜嘢留番拜山講

有乜嘢留番拜山講
廣告

廣告

清明拜山,會否是一種快將消失的傳統習俗?

關鍵在年輕人身上。咁其實千禧一代點睇拜山?和八、九十後有重大分野嗎?抑或一樣無feel,純粹應酬屋企人?佢地年紀大咗之後會唔會心態有變,開始有思古之幽情?(當然,年長的人亦可能視拜山為例行公事啫)

先人在年輕一代心目中佔甚麼分量,值得每年花一天舟車勞動去拜祭嗎?有幾多人諗過自己曾祖父母的曾祖父母是點樣既人?無佢地就無妳/你㗎喎!一啲影響妳/你咁深遠的人又好似完全無存在過咁,係咪好奇特?但要認識先人,又可以從何入手?有族譜,資料都不多,何況大多數人無呢!

拜祭又一定要燒元寶蠟燭香嗎?就咁拎啲花,甚至兩手空空去拜又得唔得?唔信有神靈,燒元寶蠟燭做乜?純粹搵啲嘢做下等拜山無咁無聊?唔信神靈,唔信人死後有靈,咁不如索性唔拜啦,因為根本就無一個對象在等妳/你一年三百六十五日來探佢一至兩次嘛!要懷念先人,大可瞓喺屋企張床上面懷念的喎!做乜同人迫一大輪,身水身汗去到墳場或道場,對住先人部分嘅骨灰鞠下躬至安樂?

再唔係,好似有單新聞咁,請人去拜,用手機直播或事後睇番,對住個 mon 向墓碑鞠躬,點解又唔夠孝順呢?

交差咁去拜,人到心不到,唔通又好孝順?

做人又做乜要孝順呢?孝順和愚孝的分別在哪?

今時今日,孝,又是甚麼意思呢?孝而不順又如何?

廣告