（獨媒特約報導）經歷過星期二晚（11月12日）的激烈戰況，中大校園翌日（11月13日）變得面目全非。地面有燒過的焦痕，行人路因磚塊被挖起而凹凸不平，路邊堆積了一箱又一箱食物和水。身穿黑衣的示威者坐或躺在路邊，安靜地留守。
另一邊廂，校內體育館搖身一變，成為了急救站和主要物資站。昨日一大早，不少街外人運來了一批又一批物資，學生和教師在站內幫忙把物資分批處理，忙得不可開交。中大教職員陳老師（化名）在人群裡四處奔走，手和腳幾乎從沒停下來。
陳老師的職員證。
憤怒的星期二：呢度我屋企嚟，警察究竟想點？
陳老師既是中大校友，也是中大教職員。他在校園內沒有宿舍，前晚處理好急救站的安排後便回家睡覺，昨天早上再回到校園繼續幫忙。「呢度（中大）我哋屋企嚟。尋晚嘅事係我不願看到的，好心痛。我唔係想改變啲咩，只是我作為老師和校友，我想返嚟幫忙。」
爆發衝突的二號橋，位於新界東交通命脈——吐露港公路和東鐵綫路軌的正上方，同時是中大校園的入口之一。星期一清晨，有人於橋上扔下雜物，阻塞交通，警方自中午起把橋佔據，並於橋上長時間駐守。期間，警方多次朝校園內發射大量催淚彈，更分別在星期一和星期二下午衝進校園，拘捕示威者。
星期二傍晚，中大校長段崇智回到校園，先後與警方和學生對話。對話後，段崇智原打算應學生要求，到二號橋與警方再次談判。但警方突然舉旗，向學生和校長發射多枚催淚彈。之後整個晚上，警方開槍的「砰、砰」聲幾乎從未間斷，示威者不甘示弱，不斷投出大量汽油彈和磚塊，一有機會便把防線推前，試圖奪回被警方佔據的二號橋，對峙持續了整個晚上。
雙方在橋邊駁火時，陳老師站在約200米距離外，注視著一切。「我趕住返嚟，咩裝備都冇，得個口罩，唔敢走太前。但不時會有流彈飛埋嚟，我就隨手拿個網球拍，擋住個頭。」看著前方的人不斷受傷、倒下、被抬走，陳老師覺得既心痛又憤怒，「根本（警方和示威者）已經當係打仗咁。啲草叢、校園設施著曬火，我心諗：『喂，有冇搞錯？呢度我屋企、我地頭嚟，你哋（警察）究竟想點？作為校友，我明白學生想反擊、想保護校園嘅心情，佢哋（學生）知道自己一後退，對面（警察）就會衝入。」
陳老師從沒想到反送中的政治事件，會演變成一場「戰爭」。學生抱著視死如歸的心態走上前線，陳老師不斷問自己可以如何幫忙：「老實講，我唔會走到最前。但我作為中大教職員，我熟悉呢度嘅資源同環境，我想好好利用自己嘅身份去幫忙，所以即刻就去幫忙set up物資站、幫手把傷者送院同聯絡校方。」
選擇相信中大高層：如果當你哋係仔女，點會唔心痛？
對於有部分學生指責教職員出現得太遲，未能保護學生，陳老師並不認同：「我知道有好多老師星期一起已經在場，一直喺後面做緊嘢。只不過可能因為佢哋比較低調，所以大家唔知道。」
他相信，不少中大教職員一直在默默守護校園：「大家都冇諗過中大、甚至香港會變成咁，如果（教職員）當你哋（學生）係仔女，點會唔心痛？我哋當然唔想見到校園變成咁，事情已經發生咗，我哋只可以諗，點先可以做好件事、幫到學生，但都需要時間。」
陳老師又說，自己至今仍然尊敬和尊重校方高層，亦選擇繼續相信他們：「星期一晚，（副校長）吳基培係當晚最後一個走（的校方高層）。佢留到咁夜係為咗同學生對話，我從未見過佢咁攰，雙眼通紅，我知道佢已經盡了力。」
中大副校長吳基培（左）
左膠老師的矛盾：我是「暴徒」的幫凶嗎？
校園發生衝突的誘發點，是有示威者從橋上朝公路扔下雜物，阻礙車輛行駛以逼使人「罷工」。原來陳老師並不支持：「咁做好危險，隨時會危害到他人生命。而且我覺得，示威者正用緊自己嘅理想，去踐踏別人嘅理想。部分人可能會因為『被罷工』而覺得高興，但事實係有唔少人的確需要上班。例如，這幾天中大嘅飯堂開唔到，你估飯堂員工會唔會有糧出？佢哋好多都係低收入人士，要養家㗎喎。美心集團嘅員工呢？小店呢？可以支持到幾耐？」
對陳老師而言，這正正是他感到最矛盾的地方。他同意警方有責任清理公路，或阻止人在橋上扔雜物，可是當警方進入校園，他只想幫助學生。他的學生會破壞校園，會扔汽油彈，會用雜物阻塞交通，是別人口中的「暴徒」。幫助學生，是否等同在協助他們傷害人？
「我成日諗，係咪真係要咁破釜沉舟，先能夠達到目標？繼續升級武力只會係惡性循環，我覺得可以有更好嘅做法。」他說。「咁講應該會被人鬧『左膠』，但我都會照講。我唔贊成『私了』，連在現在的政府管治下，我哋都有權選擇發言，點解想法唔同的人要被你們（示威者）滅聲？如果我唔可以有自己的看法，同身處極權社會有何分別？」
星期二激烈對峙過後，中大學生會翌日即向法庭申請臨時禁制令，禁止警方在沒有搜查令或按法例准許下進入中大校園，以及在校園使用「群眾處理武器」，惟法庭最終拒絕批出禁制令。陳老師認為，警方進入校園是遲早會發生的事：「佢哋有足夠藉口入嚟，校園入面有咁多違禁品……我已經有心理準備，警察入嚟，大家都走唔到。」他頓了一頓：「但無論如何，我會幫忙，我只想盡量減低傷亡。」
記者：梁皓兒