（獨媒特約報導）網民今日再號召中環「和你lunch」快閃行動，約中午12時半，已有數十名防暴警察駐守於中環各處，有持圓盾的警察及旗手在環球大廈天橋上戒備。約300名參與行動的市民集結在畢打街行人路，不時高叫「Five demands, not one less」、「我去返工」、「721唔見人 831打死人」。
約下午1時，集結在畢打街兩旁行人路的人走出馬路，約30名防暴警察隨即從警車步出，驅趕在場市民，又以警棍指嚇記者及市民。有警員舉起藍旗警告在場人士正參與非法集結，指揮官即開咪指會以催淚煙驅散，在場人士則報以掌聲。期間有警員疑情緒失控，不停斥在場人士煽動他人情緒，「我影住你呀，你同我行出嚟，你唔好再煽動其他人」，在場市民即報以噓聲。警員又「指揮」記者採訪，稱「有線電視影住嗰位，記者影住佢啱㗎啦」，該名警員其後被指揮官勸喻控制情緒。
現場有警員以隨身攝錄機遮擋行動呼號，本網記者上前查詢，即遭警員以警棍指嚇「記者上返行人路，影住戴口罩嘅人啦」。指揮官驅趕所有人上行人路後，宣布畢打街已暫時封閉，並以橙色膠帶圍封，「過馬路去皇后大道中，我講過好多次，你哋被錄影緊」，又呼籲在場市民「唔好再堵路啦，你哋影響其他市民呀，表達訴求做咗架啦，lunch time都就完買件三文治好走啦」，市民即反指「堵路係你哋呀，毅進仔」。
至下午2時，警方突然指一名身穿恤衫皮鞋的男子煽動他人情緒，將他帶到路旁搜查。在場市民激動大叫「放人」、「呢度中環嚟，警察冷靜啲」，又嘲諷警察「毅進仔有機會喺中環做嘢啦」。警員以警棍指向被搜查的男子，又將其背包物品逐一取出高舉「示眾」。警員未有發現任何危險物品，遂將男子放走，市民隨即高呼「黑警死全家」，指揮官開咪回應「好啦，大家返去啦，bye bye」，向市民揮手並登上警車離去。
於中環上班的戴先生表示，想趁午飯時間出來表達對政府和警察的不滿，「呢個根本係殺人政權，係咪要殺晒我哋嘅下一代先滿意？」他又炮轟部分警員泯滅人性，「佢（示威者）係暴動又點？你咪拉佢囉，打到佢斷手斷腳係無人性。」戴先生自言在中環上班多年，「我有樓揸手，如果咁都唔走出嚟做少少嘢，淨係攬住個所謂『中環價值』，咁我係睇住香港沉淪嘅兇手之一。」對於未來局勢，他坦言不感樂觀，「我唔知仲有幾多日可以一齊『和你lunch』 ，我唔知香港人仲守得住幾耐，希望香港人可以捱落去。」
記者：李珈旻