由逃犯條例修訂到防疫，越來越多證據顯示林鄭有病，又或者林鄭本身就係一種病，只係醫學界未記載，坊間稱之為官狀病毒，但更貼切的名號可能是： 與民為敵好打得症候群。
病癥一： 自尊心大過常識
香港出現死亡個案，林鄭居然掉轉頭，鼓勵人唔戴口罩，慳d駛，正正是用一個更大的錯誤去掩飾之前錯誤的經典例子。
政府無能，市民想防疫都無罩用，林鄭夠膽死叫下屬盡可能咪戴罩，當武漢肺炎係流料，真係要幾痴線至諗得出咁既防疫招數：既然避免感染咁難，倒不如等多d人中招，中咗招嘅人就唔駛再提心吊膽啦，就好似D人怕死，咁有乜方法唔駛再怕呢？ 死咗佢咪得囉，死屍係唔會怕死嘛！
林鄭呢種保護自尊心的方法其實尋日（二月三日）已見端倪。佢宣布增加封閉關口數目時，在記者會上就無戴口罩。抗疫都要鬥氣、逞強，跌落地拿咋沙，簡直極品！
病癥二：無邏輯可言
記者會上，林鄭的態度不是急市民所急，而是擺出戰鬥格，向醫護挑釁，話極端手段唔會得逞。諷刺係，佢出來見人，係要宣布收緊入境管制，雖非全盤接受市民共識，無全面封關，但多少回應緊罷工行動。換言之，前言後語的邏輯根本不通。如依佢所講，以林鄭的極端性格，跨境港人的利益咁重要，重要過香港人的生命安全，咁係應該所有關口都不封至係。而家兩頭唔到岸，仲衰過當初暫緩，為乜呢？香港一定要做中國權貴階級的逃生門？
病癥三：自以為是到震
醫學權威黎青龍教授接受傳媒訪問，直指林鄭曲解世衛意思，世衛根本無講過唔可以封關。黎教授支持封關，是因為唔想政府在情況變得一發不可收拾時才採取行動。但林鄭一向硬頸過人，佢話一就一，話二就二，學者專家都唔放眼內，連防範勝於治療呢套都可以唔信。周永新教授就是佢最出名的受害者。唔係話學者專家一定啱，但不同意佢地，就應該拎出實淨的反駁理據，而非一言堂，用不成理由的理由打發人家。施政不基於知識，有幾反智，有幾容易帶來災難，看看六十年代的中國便知。
病癥四：攬炒性衝動
唔好睇林鄭幾十歲人，佢其實和後生仔女一樣，非常血氣方剛，啲血好易上腦，而佢衝動起來，真係好得人驚架！
逃犯條例修訂時已經係咁，當時筆者就評論過，林鄭有責任向習近平力陳利害，撤回方案，這對習本人來說都利大於弊。之後都係歷史，林鄭至今亦都無吸取教訓，仲變本加厲。唔封關，香港爆大鑊，難道對習近平很有利？根本係連建制派都無反對咁做，林鄭為何仍死撐呢？
唔通佢唔止想同香港人，甚至要同習總攬炒？