最近都有唔少朋友、街坊問過我：「反正最後黨安法都係繞過立法會㗎啦，擺街站嚟仲有咩用？」其實每日擺完街站，返到去我都會問自己同一個問題，今日想喺到同大家分享下。
自人大宣布會立港版國安法之後，我同團隊就頻頻開街站，呢兩日行程更加緊密，日頭同夜晚都各擺一個。係辛苦，但幸好反應比預期熱烈，可以一天派逾千份單張。
同舊年一樣，好多接過單張嘅朋友都會話「你哋加油、支持你哋！」，但比起以往今年仲多咗句「唉，仲可以點樣阻止佢立法？」
身邊亦逐漸有越嚟越多朋友諗住移民，一聽到立國安惡法就覺得唔會有反對嘅可能性。甚至有人提議要刪Facebook、IG唔同發表己見嘅社交平台，人人自我審查。城外的人想衝進去，城裡的人想逃出來。
早排嘅港版國安法民調顯示，只有六成人認為國安法有問題。相比起去年八成人反對警暴、撐獨立調查委員會，明明國安法影響更深遠更具破壞性，但反對民意卻遠遠追唔上。
點解？因為我哋未出盡全力。任政權打壓力度再強，任軍政府武器再精良，都無法消滅晒所有心懷反抗意志嘅人。唯有連抗爭者自己都放棄，反抗先至真係無希望。我哋無一個必勝嘅方程式，我只知道有啲基本功夫係一定要做。對我嚟講，擺街站就係基本事，打好根基，匯聚民氣。
街站係一個離開網絡世界，真正走出同溫層嘅方法。俾個機會我哋解釋惡法，親身感受社區脈搏嘅途徑。街站亦都係同緊同路人、手足講，仲有人努力緊，仲有人戰鬥緊。每每同手足碰頭時，大家都會交換一個眼色，接份單張，互相打下氣。
我講唔出勝利終歸人民，因為如果人民自己唔抗爭，無人會打救我哋。假如無抗爭，上年送中惡法唔會暫緩；假如無人發聲，國際戰線都唔會進行得咁順利。老套地講句，堅持未必見到希望，但唔堅持嘅話就一定見唔到希望。只有自己先可以拯救自己。
遍地開花，係我哋嘅強項，在此都再次呼籲手足一齊擺街站。亦要感謝喺區議會選舉後，依然努力深耕社區嘅朋友，最近都密密開站反惡法。好似尋晚就同 李詠珊 Li Wing Shan 黃之鋒 Joshua Wong一齊喺九龍灣站外面擺街站，過去亦曾聯同不同區議員喺各區講解國安法嘅危險之處，就算無犯法都可能會中招。
有人就有燈。就算前路再難，我哋都喺度一齊行。我相信，不屈火苗，勢再燃起燎原之火。
#遍地開花 #社區戰線 #反惡法 #黨安法 #國安法