（左起）潔茹、Gladys、平平
（獨媒報導）武漢肺炎第三波疫情於7月爆發，食肆一度被禁止提供晚市堂食，亦由四人一檯收緊至二人一檯，令行業大受打擊。經營「籽樂廚房」的Gladys在8月曾參與一次記者會，講述中小型食肆在疫情下的營運困難。當會上其他人講述「保就業」計劃的漏洞時，Gladys卻請求社會多關注聽障人士的就業問題。
在訪問中，與Gladys重提當日的記者會，她指當時向籌辦記者會的區議員說：「我唔係話我冇受呢邊（保就業計劃）嘅傷害，我只係話如果每個都分享嘅話，可唔可以將弱勢社群嗰part交俾我？」記者問到，為何在疫情的艱難時刻，仍願意聘請聽障人士，她說：「因為佢哋艱難過我。」
戶口剩三位數 堅持聘請聽障人士
作為一間社會企業，籽樂廚房於2018年開業，至今已聘請超過13名聽障及讀寫障礙人士。Gladys坦言從第三波疫情開始，生意額大跌至只剩兩成，但業主卻指跌幅不大，「（租金）一蚊都唔減」，「佢哋話我間餐廳仲有開，即係有生意啦，但你搵我第三波同第一、二波嗰時比，跌幅梗係唔大㗎啦。」她有申請政府的餐飲處所資助計劃，但不夠填補虧蝕，領取的25萬當中，有八成必須用作支付人工。她笑言：「我最差嗰個月嘅戶口真係得返三位數字。」
面對經濟壓力，Gladys依然選擇聘請聽障人士做兼職，「我就話如果今日有生意我就有cash啫，但佢哋唔係喎，佢哋係完全冇cash喺身㗎喎。」
海仔是其中一名Gladys在疫情期間新聘請的兼職員工，他之前因政見及跨性別人士身份，而受前僱主刁難，最後被逼離開。Gladys透過朋友知道海仔的經歷，便親自聯絡海仔。海仔表示，在籽樂工作後感到舒暢，覺得終於可以在「黃店」工作。
海仔提起之前的搵工經歷，大多數公司擔心聽障人士的溝通問題及能力不佳。他亦批評政府對聽障人士的訴求「左耳入右耳出」，「政府唔係支持聾人就業，因為大多數聾人都係做『後台』而唔係『前台』，完全把聾人隔開咁樣。」
餐廳轉型送外賣 須由頭做起
7月突如其來的堂食禁令讓Gladys措手不及，她只好盡快轉型做外賣，「所有嘢都要重新嚟過，要學點樣去包外賣，咩熱食又唔可以同凍飲擺埋一齊，凍飲熱飲又要分開唔同杯裝。」更重要的是，要讓聽障員工學習送外賣是一件很難的事，「我又唔可以叫全聾嘅人出去送外賣，就算我叫有輕度聽障嘅人出去送外賣，佢哋要問路嘅時候，又要同其他人講佢哋係聾嘅，我覺得對佢哋嚟講係二次傷害。」
Gladys指，起初做外賣時有不少「蝦碌嘢」發生，例如籽樂位處山林道，屬於尖沙咀及佐敦的交界，因此她把外賣接收範圍定為佐敦至尖沙咀。「我真係嗰吓先知佐敦原來可以遠到去旺角，尖沙咀可以遠到落海皮。」有一次Gladys接到尖沙咀海傍附近的訂單，她笑道：「個客直情哋埋封信個地址我睇，寫住『尖沙咀』。」最後因聽障人士無法獨自步行太遠送外賣，她不得不修改外賣接收範圍，也開設了貨車或的士外賣服務。
但對於聽障及語言障礙人士而言，即使用的士送外賣，也不是一件易事。潔茹是協助送外賣的員工，亦是中度語言障礙患者。她在一次送外賣的過程中，因突然要去多個不同的地方而感到害怕。Gladys表示當時協助送外賣的的士司機一直安慰潔茹，但始終會讓她感到害怕。
員工自願減薪渡難關 客人訂檯、訂到會支持
在艱難的時期，Gladys感謝一眾員工的幫助。員工見餐廳沒生意，主動向Gladys要求扣減人工，潔茹更寫下她的日常開支予Gladys，讓她根據數目來扣減人工；餐廳廚師知道要禁堂食時，也立刻更改菜單，方便做外賣生意。其後食肆晚市禁堂食令放寬，但只可營業到晚上9時，「晚市8點15就last order，唔通要個客食45分鐘之後走？」Gladys表示，員工們很聰明，「係佢哋諗到要將晚市book檯分開兩個時段，方便啲客食嘢。」Gladys最後並沒有扣減員工薪酬，只是扣減假期，「就算扣咗，我之後都會補返俾佢哋。」
她亦不忘感謝客人的支持，直言「好感動」，「初初林鄭話禁堂食嗰時，外賣十盒都唔知有冇。」有客人在禁晚市堂食時就已訂位，表示若放寬禁令，他們就會到餐廳食飯；也有客人向自己的老闆介紹籽樂，讓他預訂到會。Gladys稱這些心意她「通通都收到」，餐廳的生意亦由疫前的兩成，回升至五至六成。
她坦言自己對於餐廳的存亡看得很開，「香港市民其實無必要同我一齊承擔籽樂嘅責任，我亦都相信如果籽樂有佢嘅存在價值，我應該都唔會結業嘅；但（如果）籽樂係冇佢存在價值，我都接受佢結業。」
批政府忽視聽障人士 籲僱主多給予耐性
訪問中，Gladys一邊向員工比劃手語稱讚對方，一邊向記者解釋聽障人士常缺乏安全感，「佢哋成日都會驚做錯事會俾人炒，怕自己冇咗份工，更會驚我請多咗一個聾人返嚟，佢哋就會俾人炒。」她與員工關係十分友好，也一直堅持「聾人唔可以蝦聾人」，「我會多啲同佢哋溝通，俾佢哋知道就算我請咗一個聾人返嚟，都唔會令到佢哋俾人炒。」她表示自己很喜歡與員工相處，認為中小企應多嘗試聘請聽障人士，也要給予耐性，多與他們溝通，「例如我唔會話我識手語，咁佢哋咪會願意過嚟搵我傾計、教我囉。」
Gladys又認為政府提供予聽障人士的資訊極度不足，「例如強積金，都冇人解釋過俾佢哋聽。」對於不明白的工作或新聞，員工經常會向她詢問。平平也是其中一個經常與Gladys談天的員工，他早前就因不了解政府的通告，誤以為所住的大樓有確診個案，令他「返少幾日工」，他對於此事亦感到憤怒。
而且，Glayds指出聽障人士需要靠讀唇去理解對方的說話，但現時政府沒有向他們提供俗稱「window mask」的透明口罩，「其實政府係應該向佢哋提供雙倍傷殘津貼，去支持佢哋嘅生活，更加應該資助佢哋去買耳機，買口罩都應該可以claim到錢。」
聾福會：聽障人士缺乏平等發展機會 社會應反思
香港聾人福利促進會就業及諮詢中心主任劉漢僯表示，中心於8月收到的求助個案，在一個月內上升了四成。他表示，聾福會不時舉辦招聘會，協助聽障人士就業，但市場給予聽障人士的機會並不理想，受社會運動及疫情影響，職位空缺減少了三至四成。
劉漢僯相信，社會對於聽障人士的間接歧視，令他們的就業機會減少，而政府有責任提供協助，「社會唔係真係俾好多機會，去讓聽障人士有一個平等發展嘅機會，喺我哋角度睇係永遠都唔會足夠。」他舉列指出，政府的臨時職位空缺並沒有針對聘用聽障人士及殘疾人士，「其實我覺得政府唔會睇唔到佢哋嘅需要，但睇到之後會做幾多，社會都應該要反思一下。」
除了金錢，劉漢僯認為政府及社會各界應增加聽障人士的工作誘因，如改善工作環境等，減少隱性歧視，「有啲嘢唔係錢就push到」。他亦提議僱主聘請聽障人士後，應多親身示範工作流程，也應給予他們精簡的指示和寧靜的工作環境，更要多留意他們的長處，「其實佢哋都想俾僱主睇到，佢哋都有普通打工仔做嘢嘅心。」