編按：此文由劉頴匡於18/5/2021寄給女友黃于喬，再由黃公開，以回應劉上一篇文章《一齊出聲努力抵抗移民潮 係每個人嘅當務之急》所引起的討論。
我都係非常感謝你幫手將我嘅心聲擺咗上網同人分享，唔需要擔心自己係咪做得唔啱。有人惡然相向正好代表呢件事有人討論，總比寫完嘢出去之後冇任何回應要好。
「留島不留人」係唔少人對於中共對港政策嘅描述。特區政府一向鼓勵青年轉到大灣區其他城市發展，而當被問及移民潮現象時，林鄭嘅一貫答法亦係話香港係一個自由地方，香港居民有移民嘅自由，絕無想留住香港人唔放嘅意思。反對港人移民一向唔係當權者嘅主旋律，尤其係佢哋顯然知道移民嘅港人以民主運動支持者佔大多數，移民潮過後嘅香港只會更易管治，若有勞動人口或專才不足嘅情況，大可隨時從大陸填補，最緊要係呢個城市自動自覺少咗一班「會製造麻煩的人」，香港反對聲音日漸消退，可以長治久安。
47人當中有好多都冇其他案件在身，換句話講喺2021年1月之前有好多機會可以隨逃亡潮移民離港，避過今日一劫。但係佢哋一直冇走到，就係因為對呢個城市有承擔，不論係想履行身為民選區議員對選民嘅承諾，抑或係想留守自己崗位繼續服務香港。
就算講到我自己，喺2019年因七一立法會案被捕之後到正式起訴、被法庭沒收旅遊證件之前，我都有兩三個月時間持有有效護照，隨時可以選擇離開香港、棄保潛逃、迴避刑責。我並唔係走唔到所以叫人一齊唔好走，而係自願留喺度面對而家呢一切，事實亦都的確因為我知道有好多人真係走唔到，而我應承過大家要齊上齊落。
離開可以有千百萬個看似理性嘅理由，但係留低嘅理由只需要一個，就係好多人都跟風講過嘅一句「我地真係好撚鍾意香港」。而我哋身邊都仍然有好多同樣好愛香港嘅人。難道「手足唔係condom」、「一個都不能少」等等嘅口號，都只能成為本世紀最大笑話？就算係七一立法會門前大家一齊呼喊、令人為之動容嘅一句「一齊走」，都係講緊要確保所有人都可以安全不受傷地一齊走，而唔係你留低、我走先。
我仍然相信選擇留低嘅香港人係佔多數。每日新聞仍然見到有好多人等候審訊、判刑，每個崗位嘅香港人亦努力生活：寫呢啲新聞嘅每位記者、讀呢啲新聞嘅每位主播，都盡力咁守護緊新聞自由。收音機聽到嘅每首歌，每個堅持創作廣東歌嘅音樂人、乃至播呢啲歌嘅DJ，都正在盡好弘揚香港文化嘅本分。甚至乎我由朝到晚見到嘅懲教署職員，雖然未必有政治立場，但都有份保證我喺香港坐監嘅待遇同喺其他落後地區唔同。我食緊嘅私飯呢？負責煮嘅嗰位廚師、負責送餐嘅外賣員，都係留緊喺香港，令香港人仍然每日食到熟悉嘅香港味道，飲到一杯凍奶茶。正因為有咁多無名無姓嘅小角色大人物每日默默耕耘，香港先仍然係香港，而未至於變成一個完全陌生嘅城市。
考慮清楚之後都係決定下定決心要離開嘅人，我只能尊重。每個人都有責任顧念自己同家人，係無可厚非。但如果可以，請悄悄地離開就好，盡量唔好渲染太多移民氣氛畀本來冇打算走嘅人。更加唔需要講啲咩充滿愧疚嘅說話，因為呢啲說話只能令講嘅人自我感覺良好一啲，對留下來的人毫無用處。我哋想知嘅，大概只係大家仍然安好就夠。遠走他方之後，請努力融入當地社會，唔好困在香港人小圈子，更加唔好令「香港人」呢個名變成我哋曾經都討厭嘅蝗蟲嘅另一個代名詞。
講吓其他嘢先。話說尋日保安局長公布最新罪案數字，其中警察國安處拉咗百零人，檢控左57人，聽落好似成績都唔錯，但諗深一層， 57個入面有47個就係我哋呢班人，略有濫竽充數之感。其實香港根本就冇咁多危害國家安全嘅人俾佢拉，但佢又要夾硬搵人拉來做啲成績出嚟，咁先對得住中央委以重任，同埋獲分配嘅幾十億資源。咁樣夾硬跑數法，難怪署長壓力大到要趁工餘時間去揼個骨。
（本網歡迎各界投稿，文章內容為作者個人意見，並不代表本網立場。）