圖：1980年香港仔街邊熟食小販！
今日同朋友食飯講開以前食車仔（拿渣）麵果陣真係係街度有架車仔係度賣麵，依家已經成了童年回憶，我聽到即刻諗起我以前屋企樓下平台簡直可以做「掃街」buffet，除左車仔麵，仲有鍋貼，炸蘿蔔餅，雞蛋仔，炒麵，蘿白糕，布拉腸粉，大菜糕等等，真係平靚正多，依家真係變在童年回憶la。
其實我覺得街邊掃香港嘅地道小食絶對係香港一種地道文化，除左平靚正仲可以食到一種風味，亦都俾左一d商販有自力更新嘅機會，唔洗攪到去攞綜緩變到社會負擔咁，甚至有人擺街邊擺到白手興家，好似香港仔謝記咁，我亦都聽過有個女人以前係戲院門口賣砵仔糕賣到可以養大3個女同係跑馬地賣層樓，不過依d咁有香港精神嘅故事都變成左集體回憶，根據獨媒特約報導「過去十年全港有效小販牌照數目一直下降，由2000年8千多個，跌至現時約4千多個，直接減少本地人口就業選擇。沒有低門檻的創業途徑，要不冒著被拉的風險當無牌小販，要不到大財團打份牛工搵兩餐....」
其實食環要規管小販都不無道理，其中我估對環境衛生有一定幫助（我估係因為揾唔到官方解釋），但係係規管之下點解要愈發愈小牌呢？大家睇下其他地方係有規管之下嘅掃街地點好多都成了旅遊熱點（我當然係捧場客），好似台灣多個夜市同北京王府井等，點解香港政府唔做下d類似野去俾人有機會以低成本創業自力更新呢？ 先别說果d官商勾結嘅陰謀論，政府依家嘅做法係取諦緊小販依個本土特色，遊客其實都係鐘意街邊風味多過上街市食野，而且政府依個做法係加大左貧富懸殊，因為佢依種做法結果係迫d商販上鋪同領滙街市，真係益晒d業主同領滙，以依家香港私家鋪位嘅癲價叫人大膽創業真係得啖笑，政府真係覺得「民生無小事」係咪真係要幫手諗下點增加非富人階層嘅就業渠道同收入呢？