網民又發揮力量，將怨氣發洩晒俾領匯身上。領匯宣傳叫人去尋味，搞團去搵番旗下老字號食店，好似瀝源盛記。結果網民唔領情，惡搞領匯句Slogan，變做「領匯 我們的尋你老味」，鬧爆領匯迫走商戶，引晒又貴又冇黎特色既大型連鎖店，甚至令茶餐廳老闆自殺，又掘番晒以前鬧人阻人發達既民主黨、自由黨、民建聯、同工聯會報導。有網民更向大家Say Sorry，認為以前支持私有化係錯既。公平D講，民主黨都Say Sorry，工聯會好快都批評領匯大幅加租，連自由黨張宇人都話成日收到飲食界同行話領匯係咁加租，搞到生意難撈。
錯就錯左，鬧又鬧過，圖又改埋，咁點算呢？每次大事件如果都係網上起哄網上了了，真係好洩氣。有冇辦法糾正呢？
自從2008年以來，開始有人提出回購領匯。領匯呢隻股定價每股10.3元，慢慢升到20元左近，但遇到金融海嘯，2008年底插落13至15蚊水位。立法會醫學界功能組別梁家騮提出動議，回購領匯。佢話如果回購兩成股份，做番個大股東之餘又唔駛全面收購，其實都係要50至60億元。結果當然又係動議被否決。我同意朋友D話要政府全數回購領匯，因為即使政府係大股東，只要佢仲係上市同埋人家有股份，政府就會話要服膺於市場運作，要對大小股東有交代，好似而家地鐵咁。
回到今天，唔搞唔搞，而家領匯個價跳到上29蚊，市值有660億，每年股息都有1蚊，好過存定期好多。而家先黎回購兩成，就起碼要過百億。唔係唔得，Totally miss the chance囉，肯定D大小股東抬價唔賣。
朋友Y話，鬼叫當初房委會咁慷慨，用還富於民呢句口號，上市而一股不留咩，又派唔到人入董事局，完全冇Say。o個時政府仲打算賣機管局同市建局添，好彩唔成事。
不過，就算入到領匯董事局，要開大會罷免對家董事，要開基金單位持有人大會，門檻都好鬼高。睇番領匯年報，是咁的：
該基金單位持有人大會之法定人數為兩名或以上親身或委任代表出席並登記持有(i)不少於已發行基金單位10%之基金單位持有人（倘該建議之委任及╱或重新委任或罷免已獲提名委員會批准或推薦）；或(ii)不少於已發行基金單位25%之基金單位持有人（倘並無提名委員會的批准或推薦）。
政府一股都冇，點收集一成基金單位呢？況且香港根本冇 Stakeholder activism，叫小股民集合股票反檯係mission impossible。
我呢，o係寫呢篇文之前都仲對梁振英有期望，反正工聯會o係領匯上市現眼報之後成日開記者會同遊行抗議領匯加租（係上市後，佢o地當日都好撐上市架！），未來特首如果爭取民眾支持，履行親基層o既使命，咁應該公開批評下領匯，甚至做D野，正如朋友Y話齋，搞下小販區同商鋪競爭下，咁佢就收割民意，工聯會又成功爭取了。
我再問一位投資達人K，佢話而家真係冇咩做到，即使如果要買番領匯，咁佢就同時要諗買番東西隧。當政府到而家都唔諗買隧道，領匯就根本談唔上。
Sad but true，翻查報紙，原來梁振英今年一月已經話回購唔係可行。報紙話佢認為好難強行買番，但可以考慮係屋邨提供額外既商場面積，即係引入競爭咁（信報2012-01-09）。但更弊既係，輔仁媒體掘番戴德梁行促成領匯用11.6億買起將軍澳南豐廣場呢單新聞，仲標榜為「首次於私人投資市場購入商場物業」，同附近商場帶黎「協同效應」。信報今日金針集跟進左報導，仲加左一句：「由於交易完成時，梁振英正擔任戴德梁行亞太區主席。換言之，交易可算是CY有份促成」。我同朋友G傾開件事，問梁振英知唔知呢單大刁，佢話我都識講大刁，唔會唔知掛。
講到呢度，真係灰晒。
臨收筆前，見到朋友分享一個叫「領匯佔領地圖」既Facebook專頁，希望各位o係Google Map標籤每一片被領匯佔領摧毀o既土地位置，同埋乜野惡行，務求集合起來，俾香港人意識到領匯點樣無孔不入。我當然身先士卒Like左，暫時諗唔到有咩搞作，當係凝聚下民眾實力掛。
圖片來源：fb/我們的尋你老味專頁