我希望學聯可以挑機 : 要求周融和佔中三子共同主持一個公投。你話「車，阿爺一定唔准公投」，錯！周融自己已經行錯一步，曾經攪過場公投，無藉口今次唔參與! 學生仔你出夠力了，讓大人在一個公投平台上決戰吧!我懇請全港市民下戰書，讓周融和佔中三子呢班帶頭人，出黎找數帶領公投，不過今次的公投只能有一次!市民要全程700萬對眼望住呢班人舉行公投，唔好俾任何一方騎劫公投。
我兩日前寫《學習蘇格蘭公投是現時唯一出路》，建議全民公投決定梁振英應否下台、應否取消功能議席、行政長官候選人是否必須公開申報所有利益和提交詳細政綱讓市民可以監察「有咩人揀」。我之後到公民講堂和分享會3次對住大眾講左公投的好處: 政治決定需要有認受性，有根有據讓票數反映民意，咁先至係真民主，唔係靠兩班人鬥大聲。公投出黎既結果先有說服力，先可以長久。
好多人怕公投被騎劫、種票，我完全明白，所以要求兩派人互相糾察，公投所問的問題需經過雙方同意，香港有資源有人材可以協助進行一場公平公正的投票，我地唔係阿富汗唔係有槍指住唔俾投票既落後國家，今次我地一於開放實體票站，叫國際傳媒監察票站。
佔中黎到呢一刻，市民付出已經好多，我接觸到的人民都說希望公投，但唔知點實行。香港人，係時候要周融和佔中三子呢幾個人找數，做攪手既要負責任，唔能夠SAY NO做懦夫，請接受一戰！