雖然遲左幾日，其實不然。啲人成日質疑「六月四日，咁之後呢？」
往後嘅日子，我地都要記住。
好遺憾，任何一科嘅課程指引都無寫呢件事，你從老師口中所聽到嘅，只出於佢地想讓你知道的私心。我地無咩途徑接觸呢件事，對呢件事認識唔會好深。
近年耳濡目染之下，我都有懷疑：真相真的是這樣嗎？大家有唔同觀點角度、有唔同立場，單純要求平反、不是很片面嗎？我卻又讀到梁文道《我們守護記憶 直至最後一人》
呢篇雖然引用左許多學者、例證同邏輯推理，可惜仍然不改佢左膠、大中華膠嘅特點。然而，對於我呢個零零後，呢篇文章卻充滿啟發。
文章提到假如中共貫徹「不同人有不同立場，不應一刀切」，就唔會批評日本學者否認南京大屠殺或低估死亡人數，或唔洗急住反對達賴集團的藏獨主張。所有野都係觀點嘅分歧，難言對錯，沒有黑白。相信大家唔希望個世界咁樣。
何況，六四唔係唔關香港事。當年150萬港人上街，學校處於半停課狀態。不少人都相信經此一役，中國就會成為民主國家，回歸在即，大家彷彿見到曙光。
香港街頭出現「我是中國人」、「龍的傳人」嘅叫喊聲，以「血濃於水」做口號證明自己。北京嘅同志唔會明白點解要「血濃於水」。150萬人上街，03年23條示威都係得50萬人，足見「香港是八九民運的舞台之一」呢個講法一啲都唔過分。我地曾經如此愛國。
美夢破碎，大家明白政權嘅醜陋，再次回到各自嘅工作崗位掙錢維持生計，街頭再次平靜下來。
「悼念有咩用？」、「我唔係中國人，唔洗幫鄰國記住」、「六四唔關我事」有時候聽到這些言論，特別係從參政分子口中講出來，我會覺得有啲心痛。
即使你覺得自己唔係中國人，卻唔代表你可以咁諗。布拉格之春、緬甸8888民主運動、南韓518光州事件......當《逆權大狀》、《逆權司機》同《逆權公民》打動一個又一個港女，各地嘅民主運動卻都係值得我地記住的。
雨傘革命呢個名，在一定程度上都係外國媒體冠上的（umbrella revolution）。事件過去，一年又一年，大家都唔希望傘運呢件事會係歷史上「被消失」、或者被竄改成「打壓暴動分子」。民主發展極之仰賴國家與國家之間互相支援扶持，因此無論你係唔係中國人，都應該「未敢忘記」六四，同其他流過血、死過人嘅民主運動。
我相信港人都係一樣，包括我自己：寫繁體字係優越啲，我講廣東話我自豪。仲有對於中國小孩隨處便溺或大媽成日蹲著的情況感到厭惡，特別係曾經被水貨箱輾過的朋友。我地厭惡中國大陸：政府、人民、文化。
但有時呢個地方總令你又愛又恨。婆婆生於大躍進年代、當時學校仲會教授俄文，佢只係識寫簡體字。但我見到佢嘅訊息，卻會覺得好窩心。
面對自己嘅親人，呢份對中國大陸嘅厭惡感都會少啲。有時候睇返當年六四啲影片，我都會尊敬個啲有骨氣嘅中國年輕人，覺得佢地勇敢、偉大。香港人在各種因素之下，必然矛盾複雜，夾雜愛恨其中，於我而言，我都唔會話自己係中國人，但我承認自己對呢個地方係有愛的。
相信民主、相信道德：以呢種觀點去睇六四，似乎係極之單元同片面，但係點解所有野都要多角度？點解咩都有灰色地帶？殺了人，咁都叫存在灰色地帶嗎？很難講過去的。
對於平反無望，很多地區的民主運動都要等許多個十年才得以正名。但請堅守「我們不是見到希望才堅持，是堅持所以見到希望」的信念。
「六月四日，咁之後呢？」之後我地都會記住。如果你係香港人、如果你渴望民主普選，請惦記八九民運，與其他一切國家追尋民主時所落下的血汗。