就住琴日813機場抗議事件，我有幾點想講。
大家都覺得琴日揭發公安同假記者係鬼打鬼。滲入嚟示威者當中，仲要俾人揭發，一個有木棍，一個有撐警tee. 跟住起哂鬨要制裁佢地，又打，又係身上掛牌，已經有啲愛國page將件事同文革比較。另一段片係示威者阻住幾個已經攞左登機證嘅希臘旅客出境。
我想講嘅係我地去機場係想引起國際注意，並且阻礙機場運作。機場宣佈停止航班，但已辦登機證嗰啲人可以繼續上機。咁我地其實已經達到目的。阻礙個別旅客上機只會係將件事怪在示威者頭上，而且無咁嘅必要。我地係想得到外國人支持，唔係要反感。
琴日有幾多係鬼，幾多係真示威者，真係無從稽考。但真示威者一定要保持克制冷靜，唔好咁易被煽動去做一啲我地鬧緊警察做緊嘅野。鬼打鬼依招一定會繼續用，所以我地一定拆解到佢。機場被發左禁制令，警察可以用藐視法庭罪係機場清場。我地已經失去左機場，無論係地方定輿論方面，所以我地係唔可以再輸。
以下有三點我覺得我地應該要做：
A. 出嚟承認錯誤及指出有鬼依個事實
開民間記者會時承認有部份示威者行為不當，傷害他人，濫用私刑，無論和理非定勇武派都堅決反對同譴責。但同時話俾大眾聽，警察同中央派鬼滲入示威者人群，有幾多暴力私刑事件係真示威者做，真係唔知道。希望大眾批評之前可以諗下依點。
B. 守軍規
連登出左post，列明五點要注意。我覺得所有真心想政府回應五大訴求嘅示威者應該要遵守。我地唔係要嚟搞事，我地係文明有秩序。我地反嘅係政府，要捍衛法治同一國兩制。所以無論我地幾嬲警察，大陸人同藍絲，都唔可以私刑。我地可以圍住佢，什至必要時可以綁住佢，但一切等警方處理。就算之後佢被警察放左，都係警察黑箱作業嘅事。你私刑就變左係示威者嘅錯。
以下列出連登post ge五大要點：
1. 唔可以打記者
2. 唔可以打救護人員
3. 唔可以係冇黑警情況下用雷射筆同電筒
4. 唔可以濫用酷刑
5. 唔可以攻擊一般平民
C. 阻止所有犯軍規示威者
就算我地示威者自律，但啲鬼自導自演，犯哂五大要點，都會將所有罪名入哂示威者到。所以我地一定要化被動為主動。無論佢係真示威者定鬼，所有犯要點嘅人，我地都要阻止佢。只有同依啲人企起對立面，先可以還真示威者清白。
我唔係要籲彼此割蓆。大家都係想香港好，而唔係為左逞一時英雄，去做啲出位過火嘅野，搏攞榮耀。我地一定要齊心，見招拆招，保持克制理性，咁先可以行到最後，獲得勝利。