【獨媒報導】今日是六四34周年，亦是女團COLLAR成員許軼Day的21歲生日。Day HK Fans Club今午出動雪糕車到旺角西洋菜南街，向市民派發免費軟雪糕，車上寫有「4th June生日快樂」。現場亦有Fans Club助手派發應援品，吸引大批市民排隊。
不過在下午2時半，有交通警員到場，環繞車身一圈視察，並向Fans Club成員表示「敏感日子，警方有清場行動，盡量配合下」，要求雪糕車離開，有成員隨即指示司機轉場。
雪糕車其後轉往朗豪坊外，再次吸引不少粉絲排隊。掛著應援布袋的粉絲「攣毛仔」表示，知道今日是六四34周年，苦笑「佢（Day）唔好彩，如果唔係都唔會被人趕咗嚟呢度」，並指預計雪糕車在朗豪坊外也會再被趕走。
粉絲「攣毛仔」
Fans Club助手C小姐無奈指Day不能決定自己的生日日期，形容警方的清場要求「九唔搭八」；另一助手阿爆則對「撞日」表示「有啲尷尬」，苦笑「我唔會被國安拉㗎呵？」
