我地需要你個like，促請環保署慳紙減廢！
話說地球之友積極推動環保，鼓勵公眾簡約生活，減少浪費；可惜，當地球之友舉辦了教師工作坊，推動公眾了解香港廢物問題的嚴重性之際，環保署居然活生生地向地球之友及各參加者展現了，香港廢物問題何解如此嚴重？其實背後的原因往往都好荒謬！
話說上週地球之友帶領一眾教師工作坊參加者參觀環保署轄下的九龍灣廚餘回收中心及廢膠轉運中心；正當大家準備進入之時，就被環保署環境保護主任攔截，要求簽署一份免責聲明 (即若然於參觀期間參加者有任何冬瓜豆腐都與環保署無關)；本來，簽一份免責聲明舉手之勞點話吖，但問題係，明明大家都係同一團的團友，環保署環境保護主任都堅時要參加者一人填一張表格，當晒係一人一封俾署長既「情信」咁 - 係一人一張A4 size、單面的表格！當日參加者連地球之友職員共有40人，即係環保署迫地球之友未學減廢，就先犧牲40張A4紙啫！
而最令人大惑不解兼激氣既係，查實明明再對上兩星期，地球之友去過同一個地點參觀，當時職員係容許參加者共同響一張表格簽晒，坐定定聽講座時就傳閱呢張大表格，明白同意就簽名，一張紙就攪掂晒！
於是地球之友即刻問點解唔可以用返上次的大表格？環保署的環境保護主任回答話：之前唔知點解出現左果張大表，總之佢地同事傾過，決定以後必須一人一form，仲話呢個係法律問題，環保唔係佢地的考慮。(真係令人大惑不解：吓？環保署都唔去考慮環保，仲有邊個部門會？！可唔可以搵人解答下我？！)
更荒謬的事情仲有來。參觀完一樓的廚餘回收中心，落去地下的廢膠轉運中心參觀，廢膠轉運中心的同事要求我哋每位參加者再黎多次「一人一信致環保署署長」！「吓？又簽？我地剛才響一樓簽咗啦喎？你哋張form有得剔參觀邊度，我地已經剔晒兩個地方架啦！」「唔好意思呀，環保署要求一定要分開簽，因為樓上樓下分開交report，所以樓上還樓上，樓下還樓下，我地都反映咗好多次咁樣好浪費紙張，但環保署話一定要。」負責營運廢膠轉運中心的慈濟同事無奈地回答。慈濟係愛地球的先鋒，要佢哋每日親手浪費咁多紙，一定心如刀割。
咁荒謬，地球之友梗係即刻抗議啦，於是，環保署的環境保護主任屈服話：好啦好啦，唔使參加者再簽，但佢哋會將剛才參加者填的forms，全部影一個copy俾樓下 (!?!!!?!)，仲話佢地一直都係咁做。即係話，40人的參觀最終都係要浪費80張紙，樹木難逃一劫。
最後地球之友帶著沉重的心情完成呢個活動，個半小時的工作坊，教師反應好好，但諗起無辜犧牲的大樹，再諗起每星期可能有幾十個團體參觀環保署豁下十幾個廢物轉運站、回收中心、堆填區…每日有幾多張疊紙因死板的行政程序而遭白白浪費？點解？點解環保署要迫我哋浪廢咁多紙張？咁我哋仲舉唔舉辦同類工作坊好呢？真係人生交叉點呀！！ (呼天嗆地中)
香港地，減廢真係有得做？
明明上次一張form就可以搞掂晒....
...點解今次迫我地一人簽一張？
地球之友會正式致函環保局，希望佢哋搵個方法平衡行政及環保兩方面。能以身作則，係市民對你o地的基本要求。
如果你都支持環保署唔好再浪費紙張，請即刻去地球之友facebook fanspage既呢幅圖，按一下like！(http://on.fb.me/10dhBB4)我地會代為轉告佢哋知市民的期望。
我地都歡迎你LIKE埋地球之友的facebook fanspage，隨時知道呢件事既最新事態發展啦！