體育

強勁包裝的飛馬 真正的幫港出聲

廣告

廣告

1075866_10153266960585230_1987464593_n

按:作客足球帶大家出入香港各個球場,包括甲乙丙丁組賽事,報導場內外有趣同無聊的消息。作客足球,絕不抄襲,絕對原創。

餓咗個幾禮拜波,港甲終於番黎!雖然香港隊係禮拜二贏咗新加坡,叫做為黎緊既亞洲杯外圍賽既大戰打咗枝強心針;但老老實實啦,場波好悶而且好似催眠咁,畢竟港隊真係鋒力疲弱。講返今周啲波先,我就入咗旺角場睇太陽飛馬對南華。場波精彩又半場已經開大之餘,仲見識到飛馬搞 Marketing 既威力!不過,話時話今日好似就係傑志主場打亞協杯八強首回合,但點解好似乜嘢宣傳都無既?學星爺話齋,marketing 既嘢,你識條春咩!

946378_10153266959620230_336438276_n

記得幾年前我都有入旺角場睇飛馬,不過就係當年空降甲組既天水圍飛馬。個陣旺角場都未重建,記得球迷既打氣聲此起彼落:「天水圍〜飛馬」!仲有兩個日本外援中村佑人同岡野雅行添呀,不過都唔洗十年,人事都已經幾番新啦。天水圍飛馬上年開始已經變成太陽飛馬,而且由搞開娛樂事業既黃柏高參與管理添呀,亦都果然有煥然一新既感覺!到底係我大驚小怪,定係香港球迷太可憐?太陽飛馬係旺角場既佈置一啲都唔馬虎,你話抄外國又好咩都好啦,但觀感真係唔差。

1187105_714598045222988_1843821904_n

球員通道、更衣室、後備席同場內橫額等都用哂飛馬的會徽同黃色,嘩,大佬,呢啲嘢係花巧呀,但球員踢都踢得投入啲啦!主場氣勢,有!球迷歸屬感,有!唔止呀,球員出場名單仲有短片介紹,呢啲嘢係外國其實真係普通到不得之了。我上個月先番完強國睇廣州恆大,一樣有。香港人唔係好有商業頭腦咖咩?呢啲就係機遇做包裝同宣傳啦。足球真係仲係廿幾條友追住個波咩你估!根據亞洲足協幾年前嘅評審,香港聯賽嘅最失敗其實唔係球場,而係市場推廣。飛馬今季仲將買咗季票既球迷劃咗係一個區,真係值得一讚!

1279034_724679697548156_1864877323_o

唔好再同我講咩踢得好就吸引到球迷入場,無睇開香港波既咪繼續唔睇去睇英超西甲囉,所以香港足球咪每況愈下囉。飛馬仲安排咗即場買波衫同印字俾球迷,以一百大元加入球迷會更有月餅、足球雜誌同小食等等...。唉,再講就以為我收咗飛馬錢宣傳啦。講番場波先,唔知係咪因為飛馬主場既威力,成場波都發揮得唔錯。雖然門將史高域有蝦碌情況出現,但最後都憑住另外兩名東歐兵拉斯錫同摩域治各自梅開二度,以5:3贏咗去屆聯賽冠軍南華。

1234937_10153266960250230_816379726_n

嗱,今日就又有場亞協八強,不過就真係無人知囉。傑志總領隊伍健唔知預計有幾多人入場呢?我就淨係知道聽日 GTA VI 就聽日發售啦,應該都有唔少球迷狗衝去買碟打機啦!我聽日就無時間入場啦,不過我就聽到有朋友唔滿意場波要收成百二蚊囉!「點解要俾錢足總搞亞少杯?佢地啲錢就用哂去裝修!」上次就同大家分享咗個趣聞,今次醒多個俾你地啦!星期六睇波個陣見到個疑似數據分析員,佢詳細紀錄咗主客球員既各項數據,唔知佢係唔係足總經理人遊戲定係其他個球隊既球探啦!

1175228_517417268347384_2059203491_n

喂,仲有呀!嚟緊十月同十一月就到咗香港隊衝唔衝到入2015亞洲杯決賽週既關鍵時刻,有兩場主場賽事迎戰西亞勁旅阿聯猶同烏兹別克,係撐香港既就入場支持同打氣。我聽到早前有一班人叫咩「幫港出聲」,又周融又鄭赤琰,既然咁鍾意代表沉默一族,一於入大球場真正「幫港出聲」啦!球場好多球迷都好沉默,好需要你地去「幫港出聲」!

廣告