好一句「不遷不拆 撤回計劃」！唔通波叔身在曹營心在漢？(john choy@新界東北style攝，獨媒編輯製圖)
呢個禮拜，特區政府為左避電視發牌爭議的風頭，刻意將輿論焦點轉向新界東北發展計劃。梁振英自己一星期內就兩次表演語言偽術，明明鬼咁多人反對，佢就話東北拆村已有「社會共識」，又指政府的解釋已經「釋除反對者的疑慮」。可能係CY偽術實在太惡頂，連梁氏愛將發展局長陳茂波响星期日重返古洞「故地」與村民對話的時候，都以行動唱反調──波叔俾攝影師拍到，响筆記頁首寫上村民的首要訴求：「不遷不拆 撤回計劃」。既然明知村民要不遷不拆，咁又點可能「釋除左疑慮」呢？
波叔墨寶，攝影師john話最好用黎做banner！(john choy@新界東北style攝)
波叔在古洞村見村民時將村民的心聲抄低。(john choy@新界東北style攝)
影到波叔抄notes既民間攝影師john choy，係新界東北style成員。佢地一直關注新界東北事件，之前曾經係香港各區搞相展，展示東北村民美好的鄉村生活。波叔上周末落兩日區，佢地就跟足兩日，星期日波叔落古洞，阿john話佢地有五個人在不同角度影相，佢咁啱係波叔身後，就影到佢抄咩notes。八方同佢傾過，佢覺得波叔也有受到村民感動，眼濕濕咁。john又話，波叔星期日講過「不遷不拆在現實中不太可能」，佢認為呢句話反而證明左，波叔都覺得不遷不拆仲有可能性既。
但係，官員表現人性通常都係剎那間的意外，返到OFFICE後又變番拆村機器，發展局响波叔完成左兩日落村後出左個FB Status(下圖)，隻字不提「不遷不拆」的訴求，回到CY的偽術路線：「很明白大家對搬遷和安置的憂慮……我們一定會繼續做好溝通和說明的工作，釋除受影響人士的疑慮」。大佬，係「逼遷」唔係「搬遷」呀！唔該波叔攞返本記事簿俾啲同事望真下啦。
除了拍攝村民生活和跟進反逼遷抗爭之外，新界東北style也有拍其他主題照片。最近在FB廣為流傳的另一幅相，就係由民間攝影師阿龍拍攝的古洞豪宅「天巒」夜景。呢張相可圈可點之處，唔係講緊豪宅有幾靚，而係睇到香港豪宅被炒賣空置的實況。入左伙幾年的天巒，好多單位都係大陸買家買黎投資，長期空置，周圍既村屋萬家燈火，呢堆天巒就燈都無隻。東北style希望可以繼續用影像，讓更多市民關注香港土地分配不公平的實況，唔好將一般人房屋供應的擔子，塞晒响弱勢的東北村民肩上。
戴毅龍@新界東北style攝。
所謂一張好相勝過萬語千言，八方期待見到更多東北style的好相！