立即捐款

周諾恆 jaco

社民連內務副主席 網誌

政經

新移民搶資源?且用數據說話

新移民搶資源?且用數據說話
廣告

廣告

談終院判綜援,講倫理可能無乜說服力。我地講d好淺既數字同邏輯。

(1) 無論終院對於綜援怎樣判,每日150個單程證既限額係唔會因此而變的,大陸人無得突然大量湧入的。

(2) 未滿七年可以「申請」綜援,但都要審批的,唔是你來到就可以任拿的。

(3) 現時單程證既限額,係未用哂的。2012年年中至2013年年中,持單程證來港的有47900人。

(4) 申領綜援人士須符合居港7年的規定,是在2004年1月1日才生效,即係之前都是未滿七年就可以「申請」綜援,包括港英時代。2003年亦即未滿七年就可以「申請」綜援的最後一年,領綜援的新移民人數,總共是71927人,並不是幾十萬人食綜援,更不是所有新移民都拿綜援。

據終院判詞,2002年6月數字,新來港人士領取綜援的比例,是16.6%。2003年3月,新來港人士中,只有18%領取綜援。就算是新移民中的貧窮住戶,據《一二年香港貧窮情況報告》,領綜援比率為26%,而在職比例高達70%。

http://inews.mingpao.com/htm/Inews/20131217/gb21445y.htm

所以當話人攞終援時,就算唔理當中孤兒寡婦老病傷殘人士既需要,都要睇,大多數新移民帶來的是勞動力。

(5) 好多人會記得,「聽呀陳太講佢個妹個同事話有朋友呀話佢隔離屋嗰家人有個表叔呢,係單程證到來港跟住食綜援食到肥肥白白唔使做架!」

都係睇返數字啦。2011年,15至55歲新移民男性的就業率為60.3%,15至55歲新移民女性就業率為43.3%。全港男性就業比例為67%,女性為49.6%。

當新移民勞動比例已經超過一半、同「local」香港人差唔多既時候,新唔新移民,現時分別已經不大。

而且整體香港勞動人口 (即係「舊」香港人) 既就業比例於十年間持續下降,而新移民勞動人口比例則是持續上升。而香港人口出生率低,因此不斷老化中,用福利既比例亦會不斷上升的。

亦即係話,新移民同「local」香港人相比,原來唔止已經唔係比較食得多福利;反而趨勢持續既話,新移民係會溝淡香港人口食福利既比例,以勞動力供養返「local」香港人。

(6) 唉好啦,讓十步俾你,就當一年來足150 X 365 = 54750人,竟然突然全部唔做野,個個都每月拿2000元綜援,再乘以十二個月,一年總數是十三億一千萬元。

(7) 我又再讓一萬步,我就當讓來港未滿七年人士也可申請綜援是 「出賣港人利益」,好大鑊,天崩地裂了,好吧。 但政府的錢,不用在綜援,唔通會益 「舊香港人」 嗎?政府派糖收買人心就叻,派糖涉及的總支出就又370億元了。

(8) 但,你以為派糖俾你你真係好著數嗎?
meanwhile 當你拎住六千蚊好開心甚至以為政府係為窮人而派錢既時候,政府…..

a – 退回75%利得稅,上市公司包括在寬減利得稅的範圍內,一年11.2億。
b – 免除全部商業登記費,一年19億。
c – 寬免四季差餉,一年117億。越多物業既人越受惠。小租戶、劏房戶,無份。
d – 退回薪俸稅方面,退回75%薪俸稅,即交稅一萬六千元的人士方可享受全額退稅一萬二千元。低收入人士,無份。
e – 取清遺產稅,一年15億。
f – 減一減紅酒應課稅率,又少收四億九千萬元酒稅了

唉!唔數啦。總之政府派俾你就派粒糖,派俾有錢人就派間廠!貧者越貧佢唔理,但係就富者越富咋。

(9) 高鐵,記得嗎?700億,都未埋到單。仲要係行唔到高鐵速度。仲要人地大陸開始叫停高鐵工程。 [sosad]

(10) 區議會通常都建制派多,所以政府派俾區議會玩大型工程或資助區內活動的撥款,一年就每區一億了。你樓下d建制派成功爭取既無厘頭涼亭或者建制派議員出風頭的街坊聯歡就係咁來。

(11) 係將軍澳寶盈花園旁邊,係一個本身有紅綠燈有安全島的地方,又起一條行人天橋,咁又花政府7000萬了。而這些工程根本就在市民不知不覺之間於各區無日無之地進行。

(12) 2012至13年度政府的整體支出為3,773億港元,收入為4,421億港元,因而有648億港元的盈餘。

(13) 外匯基金於2012年12月31日的資產總值為27811億元。

(14) 爭取起公屋、爭取全民退休保障、爭取富豪遞增稅、爭取回購公用事業、爭取全民醫療保障………等等等等,涉及金額同埋對民生既影響,嚴重唔知幾多倍,大鑊、天崩地裂唔知幾多倍。

而且全部都係政府應該做、有能力做,而唔做的。

做人,霸氣d,唔好下下淨係識計d婆媽數。

(15) 咁又好多人話香港地少人多裝唔到咁多人。

咁香港人口,扣完外移人口再加返單程證呢,即係淨增長呢,2012年年底統計只係得0.9%,2013年年中得返0.4%。
唔夠位?係本身就唔夠位。除非搞人口滅絕。

(16) 這不是甚麼陳雲式理論核彈, 只是一個無乜讀過書的人用少少時間google下都可以整理到出來的一些數字。

廣告