立即捐款

大球場道

球迷自資出版,採訪場邊故事。用行動支持香港足球,走出我們的大球場道。 網誌

體育

大球場管理公司做嘢認真少少好唔好?

大球場管理公司做嘢認真少少好唔好?
廣告

廣告

大球場呢樣唔得果樣又唔比,林林總總司徒法正都化解唔到既事,相信由球員、職員、記者、球迷都好唔滿意,只不過係官僚制度下投訴無門咁解。

最近賀歲波除左有球員、記者係影捧杯相時被趕令人十分扯火之外,仲有半主隊昆卡職員想掛球隊banner時被阻止,搞到昆卡十分無癮。係足球場有球迷、支持者為球隊打氣好正常,打得氣就自然要將球場佈置得好好睇睇,形造一個主場氣氛,咁banner就一定要有架啦。但係昆卡職員都未將banner掛起,已經五六七個保安走埋去話唔可以唔可以,因為係大球場掛banner唔可以闊過一個鐵馬,最終昆卡職員只能upset地將條banner灘係地上,比穌哥佛祖睇喇。

但點解唔比闊過一個鐵馬呢?危險咩?唔清楚,可能怕人收banner時用魔術變走隻鐵馬掛。上到康文署個大球場官網,就有十二條條例及守則放左係到,當然係唔Q關事。始作佣者係個鐵馬,但點解大球場整個低層觀眾席都有鐵馬呢?唔通出左名好靜既香港球迷好危險?反南烈士見到陳七踢得太好,可能會衝入場咀佢一野,等佢失晒魂?唔知道。

大球場好多野都唔比,但往往你只會得到一個笑唔出既原因,或者永遠唔會知點解唔比。其實外國球場好多野都明文規定,好似橫濱水手主場,屬於橫濱市政府既日產球場咁,不過對於球隊banner並唔需要透過球隊特別申請,只係規定左幾樣野:

  • 橫額不可遮蓋廣告版
  • 不可展示有誹謗中傷標語的橫額
  • 不可在不能進入的範圍展示橫額
  • 若橫額遮蓋其他觀眾視線,請跟職員指示移動橫額

等等

另外賽會方面亦只係統一限制左幾樣野:

  • 不可在非指定場所外展示橫額
  • 大型旗幟不可遮蓋廣告
  • 不可向草地使用擴音器,或用擴音器向第三者叫罵
  • 不可站在椅子上打氣

等等

條例係清清楚楚寫到明,不過只要唔涉及遮蓋廣告或者危險事情,好多野基本上係默許的。所以大家可以睇到日本球場banner周圍都係,氣氛好到不得了。因為球場係用黎上演一場足球比賽,一切都應該以足球本質為核心,球場事當然要用球場內既方式解決。球隊落力做宣傳吸引球迷、球員盡力比賽踢好波爭取成績、球迷盡力為球隊打氣製造氣氛,呢個係球場入面做事既唯一方向。係足球場入面既足球人係有信念有目標,會為喜歡既事盡力做到最好。所以係絕對唔會認同以方便管理,少做少錯唔做唔錯既做事態度。

最後一句,大球場你地既做事態度令我地感到十分之惡心。

廣告