文：藍骨
面對無能腐敗嘅政府，往往會令人萌生無政府主義嘅幻想，叫人民喺冇約束嘅社會之中自律自由咁生活，選擇自己嘅路。呢個理想嘅國度喺現實世界之中仲未有實現，不過最近喺網上就有一個好有趣嘅實驗，畀人試下到底完全嘅無政府主義到底會係一個點樣嘅情況。
今次嘅實驗係由著名嘅遊戲直播網站 Twitch 舉辦，開放經典嘅寵物小精靈（紅版）遊戲畀網友參加控制，特別嘅地方係果萬個網友都同時控制一個角色，喺即時對話之中直接打指令，就會自動變成遊戲入面嘅動作，好過癮。雖然遊戲嘅目標好清晰，而且大部份人都知道個流程應該係點樣，但係每個人都有唔同嘅玩法，結果一開始主角連開始嘅城鎮都離開唔到，只係不斷自轉，而且太多人不斷打「Start」，令主選單彈出嚟，阻住遊戲繼續落去。
最初啲網友都感到好氣餒，估唔到一班人要一齊控制一個角色係咁困難，不過慢慢都開始達成一啲共識，令遊戲可以好慢咁繼續落去。Twitch 大概都睇唔過眼，後來加入咗禁止人不斷打「Start」阻住遊戲進度嘅規則，而且仲有新嘅「民主模式」畀人投票決定下一個指令，而「無政府模式」同「民主模式」係可以透過投票嚟切換嘅。係新嘅「民主模式」之下，遊戲進度就快咗好多，減少咗自轉嘅情況。當然，咁樣就令一班「無政府」支持者不滿，如是者過咗超過 16 日之後，終於打爆機。依家正係進行緊新一輪嘅水晶版遊戲。
呢個社會實驗雖然唔係直接測試無政府社會嘅實行，但係都畀人感受到完全嘅自由之下，係好難達到一個共識去令遊戲順利咁繼續落去。喺寵物小精靈遊戲裡面，已經有一個既有嘅規則同路線畀人去跟隨，尚且有咁大嘅問題，如果係擁有無限可能性嘅現實世界入面實行完全無政府主義，後果可能會更加嚴重。而後來加入咗「民主模式」就係一個更加好嘅示範，投票雖然有令一部分玩家嘅決定被否決，但係就令大多數人嘅指令可以順利咁執行，遊戲進度都明顯快咗好多。喺呢個簡單嘅實驗成為社會嘅縮影，其實都好值得我哋反思。
難得有個咁有趣嘅遊戲實驗，大家都可以去感受一下幾萬人一齊玩寵物小精靈係一個點樣嘅情況，甚至自己玩埋一份都可以。有興趣嘅朋友可以去下面連結睇睇。
http://www.twitch.tv/twitchplayspokemon
【今期流行】：
今期流行的除了椎名林檎，還有一堆我們無時無刻都接觸著的電子產品。無論對科技熟悉與否，推陳出新的產品，總是推著我們走。稍瞬即逝，一日千里的科技潮流，要如何準確捕捉，洞悉背後的暗湧，是這時代值得留意的課題。如果有獨特的見解，務必留言分享。