立即捐款

足球說故事

你看足球,我說故事。 網誌

體育

旺角場真細小小小

廣告

廣告

一直覺得旺角大球場先係香港真正嘅主場。

雖然球場只能容納六千幾人,球場又細,設施、配套、外觀點都比唔上香港大球場,但對比香港大球場,旺角球場完全可以反映出香港獨有嘅本土特色,一個字:細!

香港地少人多,去親邊都迫親死,搭車迫餐死;食野迫餐死,行街迫餐死,連啲高樓大廈都迫迫夾夾,假期真係寧願躲係個間不足三百尺嘅屋企,都費事出街同人迫。急速發展同人口增長令香港嘅空間愈黎愈細,細到已經再容納唔到咁多人。但係喺呢個處處都講商機嘅大都市中,竟然都可以容納一個標準足球場,座落於九龍區嘅商業中心地帶不特止,仲要近到係正火車附近,方邊嘅話仲可以去隔離花墟買花送俾傾慕嘅偶像,一邊賣潮流服飾和食肆,一邊賣花,完全感受到香港地個種錯綜複雜嘅城市規劃。但正正呢樣嘅「錯」,反映出香港地真係細到仆街!

到達球場門口,你唔洗好似去外國球場咁要行勁入勁耐先到看台,係旺角場你入咗閘,離看台已經不遠。看台同球場嘅距離幾乎是零,球員幾乎可以同球迷有好親密接觸,球迷每分每秒的親切問候猶是清楚,加上地方細,人聲加埋一齊就更加應聲。唔同大球場,地方大但人少,啲聲唔夠集中,相反旺角場就做到呢樣野。最重要係,大家都坐得好埋,同個球場貼得好近,睇得好清楚。

係,香港大球場啲草呀,啲位呀,啲設備套配係比旺角場好,但係要山長水遠去到銅鑼灣,仲要行一段路先到,呢點已經輸左比座落於旺角火車站的旺角大球場。但係最重點都唔係呢樣,而係球場比球迷個種親切嘅感覺。

去親大球場,都幾乎係吉位仲多過人坐。除咗七人欖球賽或者其他大型歌舞表演或者啲外隊訪港外,都幾乎就唔會爆場。就算平日甲組決賽都好少人入去睇,入到場你會覺得自己係少數的一份子,望落去真係好核突。但旺角場唔同,即使只有千幾人入場,你都唔會覺得個球場有過份多嘅吉位。而去到球場個下,你唔會覺得自己係去左一個陌生地方,因為望出球場外面,望到嘅已經係個架平日返屋企擠餐死嘅列車;個條永遠都有好多車行嘅太子道;個條不時會經過嘅界限街,場波完左仲可以走去旺角/太子附近行下食下野,你會覺得自己仲係一個熟悉環境入面。唔同香港大球場,好似去左一個好遠好遠好遠嘅陌生地方,而去球場個條路你唔會識點行,就算行過好多次,對條路都仍然好陌生。去到大球場,你唔洗擔心自己無位坐,入面根本唔會有好多人坐係到,因為香港大球場實在離我們太遠了,也大得跟我們這種升斗市民格格不入。唯獨坐係位於旺角呢個細細嘅球場,才會感覺到自己跟香港仍然很貼近。

或者是旺角的緣故吧?但我想真正的原因是我們根本已習慣了生活在一個很狹小的空間裡,不知不覺地從厭惡中產生了一種特別的好感,既討厭,又歡喜。

廣告