今個星期，最為勞工基層嘅工聯會由來料，早兩年選立法會先講明要爭取七日侍產假，上到立法會對住七日侍產假嘅修訂就坐喺度唔投票，認真搞鬼。佢地總有自圓其說嘅方法，話勞顧會傾好左三日就三日。哈！幾時我地冇份選嘅勞顧會比我地有得選（雖然啲特權階級多票過你同我）嘅立法會更加值得尊重呢？阿嫻姐如果真係介意被人話佢「出賣工人」，好心就退會啦。你工聯會上面係中共呀，中共冇為工人好多年啦。喺香港，佢地同大商家聯手治港，喺大陸，咪搵警察打啲罷工工人，尋日喺深圳有一單啦！
講返體育運動，其實職業運動員都係工人，喺外國運動員工會多的是。最近有兩單野都幾值得留意。喺英格蘭，強姦罪成入獄嘅前威爾斯國腳前鋒伊雲斯（Ched Evans）出獄一度返左入獄前效力嘅錫菲聯跟操。但係好多錫菲聯球迷都不滿球會有意欲搵一名強姦犯上陣，搞左一輪錫菲聯就叫伊雲斯咪再跟操。咁英格蘭球員工會就話伊雲斯都應該有就業權利，唔應該咁樣對佢。而家伊雲斯都未搵到班落。
類似嘅野發生喺美國。美式足球NFL今年先有懷斯（Ray Rice）因為當眾打自己個未婚妻，唔單止球會巴爾的摩烏鴉同佢解約，NFL賽會仲罰佢無限期停賽。但後來喺球員工會上訴下佢就上訴成功，而家可以同任何球會簽約。另一邊廂效力明尼蘇達維京人嘅柏達臣（Adrian Peterson）又因為虐兒而被判緩刑、罰款四千美金同埋做八十小時社會服務。於是NFL賽會又罰佢無限期停賽，而停賽期喺出年四月十五號前都唔會完。早幾日NFL球員工會就對NFL賽會提出訴訟，希望柏達臣可以早啲解凍。
呢兩單野背後都牽涉到我地對職業運動員呢一行嘅理解。對工會來講，運動員係打工仔女，就算犯法受到懲罰，咁受過司法制裁後就應該有權復職啦。但係對好多俾錢支持球隊嘅球迷來講，運動員往往仲係社區嘅代表人物，俾啲私德有嚴重瑕疪嘅人代表自己又係咪可以接受呢？對賽會而言，咁就可能更加著緊嘅係賽事形象，始終形象住往同利潤相關。
究竟運動員係純粹普通一份工作？定係好似醫生律師嗰啲專業人士咁，要佢地遵守更嚴厲嘅道德操守標準？呢個哲學問題真係諗爆頭。但點都好，我明白工會梗要為工友會員維權，但係「工人飯碗」呢四個字又唔係下下大晒嘅。正如當年工聯會以「飯碗」為名撐高鐵、今年又以「飯碗」為由反佔領。聽落去好似好合理，但係工人的生活都唔只係飯碗簡單架嘛。如果「飯碗」永遠至高無上，咁工人唔單止應該支持拆菜園村，軍工廠工會直頭應該支持開戰，但唔同戰爭真係對工人好？搞工會，就係要拎返工人當家作主，但個政府係有錢人選出來而工友又冇份揀，建設啲乜冚棚爛都係資本家話事，工人只係喺呢個制度下乞啲餅碎，咁咪係黃色維穩工會囉。
最後都係講返波啦。呢排除左689乞人憎外，南華足主張廣勇都好似幾乞人憎。包括范俊業同楊正光在內幾名職員已經先後收到大信封。以前羅生都得罪唔少人，不過張生連公關都唔曉做呢！據報南華啲球員都唔多滿意，但暫時都唔見有乜工業行動。其實敢怒不敢鬥都好合理。話晒邊個出頭隨時成為下一個被開刀對象，又有邊個咁勇敢。其實呢單野正反映左港職係要個工會，喺呢啲時候幫球員職員發聲，咁啲職球員先唔駛下下睇老細面色做人。
我知，總有人話港職呢啲咁流嘅聯賽點搞工會（其實鳳凰計劃已經話要搞個代表球員的組織，但而家都仲未有）。不過你睇下澳職A聯賽咪得嗰十隊，上星期佢地個球員工會先就集體談判協定嘅解釋方法幫西悉尼流浪者班球員出頭。對岸台灣中華職棒得四隊添，都有球員工會。既得利益者最鍾意嚇人，等打工仔女唔敢爭取自己嘅權益，打工仔女（包括港職球員）唔好咁易被嚇親！