中學時期每次叫踢波都能夠做到一呼百應，閒閒地都搵到十幾廿個人同你踢波，仲可以放學直接去球埸踢到夜晚再一齊食dinner，閒談吹水邊班條女正又講下邊套av好睇。
人大咗，無論踢波次數同人數都減少，埸邊吹水話題再唔係傾邊條女正，而係講緊大家份工點，儲錢問題，生活問題，彷彿兒女私情通通都係無意義嘅話題，搵錢最實際。
由十幾個人變成8個人.....6個......5個......最後只係剩返自己一個。
當老母成日見我留喺屋企打FIFA就會話:「以前成日出去踢波做運動!呢家就日日喺屋企對住部電視踢波!」
或許老母唔係好知道足球係一種團體遊戲，唔係話我想踢就可以踢到。
「返完工好累呀」、 「今晚陪女呀!遲下先！」、 「沖咗涼喇!唔踢啦！」、「有邊個去？唔夠人我唔去喇」、 「聽日返早呀!唔踢喇！」、「今晚我要追孔明數寫故呀，唔踢喇」
好多種「理由」同「藉口」打擊攪手嘅意志，最後踢波變成一種奢侈品。
琴晚，有朋自遠方來，佢好想同我地踢返埸波，夾咗好多日子、用哂人情牌叫人出嚟踢務求砌夠一隊波跟隊，幾經辛苦終於可以踢波。
阿卡企喺場邊，望一望球埸上嘅學生哥，不禁感概咁講：「以前我地踢波總會有班mk仔拖住條女喺埸邊食住煙痴波踢，呢家到返我地喺埸邊吹水望住班學生哥踢波（我地唔食煙）！真係時移世易！」
踢波期間，我地都打住「快樂足球」，雖然粗口橫飛係例牌一定有，但對於大家好快無氣，踢波失誤都一笑置之。感謝對手一直都無離開，陪我地踢足兩個鐘頭，為今晚踢波劃上完美句號。
當大家換衫時侯，亦都係吹水時間，閒談傾間不禁懷愐以前。
「阿明仲有冇寫故？仲有冇出書呀？我記得之前你寫過我地踢班際足球!我好似叫……咩阿風定咩？」
阿智即時糾正：「你有冇睇架!阿風係大學呀!仲有個女仔叫.....叫咩靜兒呀嘛！」
我心諗：「係叫阿靜呀......」
佢地雖然係我朋友，但從來都唔會睇我啲故，或者睇幾下扮睇咗，又或者講緊嘅事就係佢地經歷嘅事，睇返都無咩特別。
雖然埸地熜咗燈，但我仍然要求合照一埸，重現當年班際足球盃出埸陣容。
行去食宵夜時侯，我拎部機出嚟睇下頭先咁暗影唔影到相，阿智就笑我：「喂！我地仲未死架！唔洗咁快懷念呀！」
宵夜期間，我地都平靜地傾談，而隔離枱有班mk仔女喺到大叫，又玩到好癲起哂身屌哂老母咁，我地望住佢地彷彿望住以前嘅我地，以往成班人一齊出嚟屌嚟屌去嘈到仆街，但呢刻大家都好內斂咁傾下工作上嘅事。
嗰刻大家都概嘆我地都變了，係時間令我地變了。
不過阿卡突然間爆出一句：「屌你睇下嗰邊!有個學生妹好正！行緊埋嚟！」
之後我地成班喺無夾過嘅情況下，以一秒嘅速度起哂身移去阿卡嘅視線望，然後不斷問：「邊到邊到個學生妹係邊！」
.......
原來大家都仍然保持住以往一點個性。