Worldly wisdom teaches that it is better for reputation to fail conventionally then to succeed unconventionally - John Maynard Keynes
隨俗而失敗，比起不隨俗而成功，更易獲得讚賞。 - 圖靈在英皇書院（唔係梁振英果間啦下）既師兄，凱恩斯講既
OK，當係我老屎忽睇唔過眼80後充滿希望，或者係我酸葡萄。但肯定既係，如果「解碼遊戲」（Imitation Game）既編劇龜含摩亞（Graham Moore）冇拎完奧斯卡仲講一大堆乜春stay weird的濫情廢話（而傳媒又樂於執口水尾），應該唔會有呢篇野。
古仔，當然好。演員，十分好。但，套戲，其實真係相當之媚俗。完全符合米蘭昆德拉（Milan Kundera）講既Kitsch。本來呢，媚俗咪媚俗咯，有誰不媚俗？況且，奧斯卡之嘛。真係絕冇問題的。所以最觸動我神經，始終係呀編劇講一堆乜春stay weird的矯情造作。而佢老哥呢套戲完完全全示範左the opposite。
中文片名譯「解碼遊戲」，唔知係咪因為挪威導演前作「獵頭遊戲」（Headhunters，呢套好睇）。但英文片名，Imitation，係模彷嘛。絕對冇打算怪中文「譯錯」，中譯「解碼遊戲」恰如其份。而原本英文片名，黎自圖靈自己提出的概念，在戲中只係在警局一場戲輕輕咁帶過。
不少人提過套戲三個時空（少年，二戰，戰後）的交錯，做得幾好。我認同。但整體上，呀編劇，就真係Imitation Game，模彷別人啦。Stay weird？後生仔，你未夠爐火純青。
首先，其實可能係我的問題，但我認為，套戲既主題，唔係好明確。到底係想寫愛情？戰爭？歌頌愛國情操？定講我地點虧欠左圖靈？我就唔係十分肯定。
當然亦有不少人質疑片中淡化左圖靈的性傾向，同埋受既迫害。我覺得可以接受，畢竟只係題材的取捨，全部料炒埋一碟可能更差，況且近年的大趨勢都係興拍大歷史大人物的一小個段落。
聽得更加多的批評，係電影嚴重偏離史實。你隨意上IMDB或維基百科都搵到一堆，我不再重覆。講件舊事，當年「有你終生美麗」（A Beautiful Mind），肌肉佬羅素高爾（Russell Crowe）扮John Nash果套，我都狠批同史實相差太遠。但當年朋友友善反駁，喂，電影咋，唔係拍紀錄片。我諗左一排，都覺得有道理。往後亦冇咁執著。正如睇霍金（The Theory of Everything）套戲，咁梗係美化霍生啦，梗係同史實有點不同啦，梗係淡化自己搞上大波女護士然後離婚之後又翻啅啦。明既。
而面對「偏離史實」的批評，今次呢位編劇直頭同大家講，超，藝術既野你識條撚，咁撚鍾意睇史實既上維基百科啦。你睇莫奈（Claude Monet）畫睡蓮，又去查下係咪咁既樣咩。
嘩，拎自己同莫奈比添，80後真係充滿希望。好，講藝術下話，就同你講藝術。某程度上，編劇講得有道理。即係等於早幾年啲友講吳宇森套「赤壁」偏離史實。喂大佬，「三國演義」幾時變左「史實」先？想睇歷史既拎本發霉陳壽出黎睇飽佢。
所以，只係就戲論戲，就只係講好唔好睇，打唔打動到人，係咪情理之內。而不幸地，我認為套戲，Fail左呢個 Imitation Game。
將圖靈整到好似自閉症的傻仔煩西，唔緊要。咁但，其實個作用係乜呢？真係stay weird？結果同編劇一樣，圖靈一樣學識隨俗，噢，去完飲包兩個生果比同事啦下，搞好關係。仲同同事去social下講下女人啦。所以就修成正果，有同事撐，你炒佢唔該炒埋我，同埋我，我，我。stay weird是咁意思嘛？
OK，聽古唔好駁古，我就當古仔睇。但，即係你編劇自己庸俗就好啦，唔好當啲觀眾都咁TVB丫。係呀可？成堆大英頂尖數學家語言學家，搞足N年，先忽然間溝溝下女醒起。係噃，德軍電報，梗係會天氣報告，梗係會有女朋友名，梗係會有Heil Hitler。Bingo！真係大發現呀可？ 好彩呢啲只係古仔，如果當年我大英堆科學家咁弱智，你同我分分鐘番學學緊德文星期六睇緊德甲。
就當真係咁Eureka都好。喂，解完碼，成班友仔都識德文？定覺得納粹德軍之間會講英文？唔好睇咁多Tom Cruise啦阿美利堅大佬。
好，又當比你過骨，「我識德文又要話你知？你點證明佢地唔識？」。又即係，你覺得呢班解碼隊，可以自把自為決定埋「我地要扮唔知，由得隻艇比納粹打沉，否則就會穿煲」（而仲要觀眾以為好醒！）？最後仲作埋呀某人阿哥在隻艇上面，去講點「忠義兩難全」。真係唔好笑TVB啦，奧斯卡最佳編劇都係咁上下架咋。
最後抽多野。好歹我都讀過幾年中學。即係，一套講數學家既電影，居然讀錯歐拉（Leonhard Euler）個名？係哀拿，唔係U拿呀大佬。唔識既，youtube幫到你。或者正如戲中講，搵個德文好過布萊希特（Bertolt Brecht）的專家啦。在你班友出黎講話「個個識德文咩」之前，又不妨話你知，好多鬼佬都恥笑左呢個錯誤。即係好似「赤壁」咁，創作人物或唔跟「史實」冇所謂，但甘寧變左「甘興」還是比人恥笑的。
凡此種種，其實唔會令套戲變為爛片。絕對唔係。但龜含摩亞先生仲出黎講果堆咁既野，就真係夠哂呵欠。16歲諗過自殺？有幾weird？仲要拎出黎可歌可泣搜神記？邊個後生冇諗過自殺？好心啦。拿，而家冇stay weird，咪名成利就咯。抵錫。
呢類東西，同戲中不停咁重覆「有時就係最xx的人成就最xx的事」的soundbite一樣咁媚俗。完全就係蜘蛛俠的「能力越大責任越大」。岩哂而家鍾意速食又要覺得睇完戲好有message的觀眾。
而，唔好比我睇死丫，呢位龜含摩亞，好快就會去拍Super Hero之類的主流大片。Stay weird？身體很誠實啦。不過最緊要觀眾聽得開心，正如個個都覺得「珍惜眼前人」「追求夢想」然後番去繼續當屋企人透明聽朝繼續準時番工。
唔講套戲了。下次篇文同大家正經講下Enigma。對，除左港產片西片金融，我仲識講科學的。