望住呢張圖，不禁要唏噓一句：點解今日嘅巴西9號會弱到呢個地步？
由經典神聖嘅朗拿度，到又愛又恨嘅壞孩子阿祖安奴，到後期漸趨平庸嘅法比安奴，再到已經無甚光環嘅費特叔叔，以至今時今日你未必知佢係乜水嘅泰迪利，巴西9號竟然去到一個青黃不接的時期。接替者實力每況愈下，一代不如一代。
阿祖安奴充滿天份卻自甘墜落，未接班已先退下；法比安奴為中庸之輩，偶有佳作但大多時間都是不可靠，此子早已被評為巴西史上最差9號；豈料此刻殺出一個平庸無奇嘅費特接替法比安奴之位，榮登巴西史上最廢射手；然而一山還有一山高，一鳩還有一鳩粗，泰利迪嘅出現，推翻了費特位都未坐暖嘅皇位，此子擁有外星人嘅臉孔，卻不如朗拿度般擁有外星人嘅神奇，甚至比費特更加費特。望住泰迪利，你無法想像巴西鋒線竟然變得咁人材凋零，連一個似樣神手都無，甚至有一刻感到奇怪，點解咁嘅能力都仲可以入選巴西隊，甚至穿起代表射手嘅9號球衣。
係鄧加選人問題？定真係一代不如一代？
在尋找後卡卡和朗拿甸奴年代嘅10號接班人同時，其實巴西似乎更急切需要尋找一位能夠分擔尼馬入球工作嘅射手。要是搵到，今時今日就唔洗依靠大部份時間係巴西本土聯賽效力但今季轉投中超搵食嘅泰迪利，或者已經回曬塘過曬氣嘅羅賓奴。即使傳媒繼續吹大國內個啲所謂嘅超新星，都無法掩飾巴西鋒線人材凋零嘅可悲。
球迷並非要求再出現一個如同朗拿度般可怕嘅外星人，只希望看見一個叫做能夠俾到球迷信心嘅巴西9號而已，但要做到稱職又有貨交兼俾到信心又談何容易呢？只怕去到2018年世界盃都仍未見到呢位救世主出現。或者等埋發叔，應該差唔多了。
圖：BBC Sport