反水貨客帶貨，和爭取港鐵批準帶樂器，根本係兩個無關係，甚至互相矛盾的方向。本土派現在指摘港鐵係「執法不一」，但假設港鐵執法有一致準則，佢地對事件的回應係︰
（一）一致從寬，即係水貨同樂器都過得；
（二）一致從嚴，即係水貨同樂器都唔過得
對於希望帶樂器坐港鐵的人來講，單單「爭取執法一致性」對佢地一啲好處都無，佢地要的係「一致從寬」，或者「酌情執法」（即係執法不一）。
反過來說，對於本土派來講，佢地一直關心的係港鐵要搞水貨客，唔可以比佢地直行直過。如果結果係「一致從嚴」，佢地係樂於接受的。樂器入唔入到港鐵，根本無關重要。
個「疑似 sweet spot」係爭取到「酌情執法」加埋「對水貨客從嚴」，但咁對港鐵來講根本係雙重麻煩。佢地要掛住面子同穩住前線士氣，無可能就咁改執法準則，唯有加強人手去做「一致性」，於是變成乜都度一餐，即係盡做「一致從嚴」，最多話人手唔夠 sorry。
如果有人認為兩班人可以一齊做嘢，呢個係同一個運動，咁未免太唔清醒了。（抑或係太唔誠實？）
補充：見到有人 comment 我，話『原來最重要係要一視同仁守規矩，亦唔會向「港鐵的規例和實踐」落手作為行動方向 ，咁聽話--- 從此感覺到一種和理非非左膠味道~』，在此回應一下。
我想澄清，要求「一致執法」係我理解本土派現在叫緊的口號，唔是我本人的要求。如果係要求不一致執法，咁我已經寫左係「對港鐵來講雙重麻煩」。
若以「港鐵的規例和實踐」作為方向，真係除非你揸住佢手寫左個雙重麻煩的 sweet spot 落去，否則依然係兩個方向。是否可以操作？唯有講句，大家叫口號同影相開心啲。唱「今天我」定舞旗就隨心啦，姿態唔同而已。