日前崔世安「宣布」海關關長賴敏華「自殺」身亡，普偏嚟講，澳門人冇照單全收官方嘅「自殺」論。
「海關關長」屬主要官員之一，經中國政府任命，到咗咁高嘅位，相信「冇解決唔到嘅問題」。雖然崔世安主動澄清關長冇涉任何廉署調查，但基於我接觸廉署、檢察院、警方之類機關嘅經驗所認識，以澳門嘅法治水平，歐文龍被郁（案件由英國將可疑匯款資料交香港廉署）係非常特殊嘅例子。歐案之後，到局長級都已經幾「安全」，何況係主要官員，所以關長因涉澳門刑事機關調查而自殺嘅可能性，即使崔唔預先澄清，我都覺得機會唔高。
而話自殺同工作有關，即使係孭咗隻好大嘅鑊，處理方法有好多種，包括因「腳痛」、「私人」等原因落台，唔駛走到上絕路。
或者由另一角度睇，推測有咩人想關長必死不可。可能係關長知道咗一D秘密，要殺人嚟封口。但關長由崔政府、本地各界勢力視為神嘅「中央」任命，即使有本地勢力有意圖隊冧關長，都會避忌「中央」幾分。
當然，唔排除有人會暗中追查幕後「真兇」，即使有一日確定屬他殺同埋搵到真兇，既然死因已公開定為「自殺」，就唔可以由正常刑事司法途徑追究責任人，相信都只能夠用一D地下式手段解決，唔會令真相見光。
我個人只係2011年底喺一私人場合同當時係副關長嘅賴敏華同枱食過飯，個人對佢冇咩認識。但據whatsapp有加到關長嘅人士透露，關長最後上線時間係當日 15:28，非常接近崔世安公佈嘅屍體發現時間，當然，唔排除係關長電話冇上鎖，到場警員到場後打開過電話嘗試了解 死者身份。
總體上，澳門人都認為崔世安一開始快速高調咁定調「自殺」非常有可疑，加上喺重大敏感事件上澳門人對司法獨立信心都唔高。如果政府提供唔到足夠真相令公眾滿意，澳門人就唯有繼續慢慢發酵各種陰謀論。