毛記電視分奬典禮搞得有聲有色。觀眾受落除了因為內容扺死之外，或多或少亦因為香港人在100毛搵番自己。
不知道由幾時開始，我地唔再覺得香港屬於自己。廣東話變成方言，賣賣下書被人夾左上深圳，大嶼山發展成旅遊區，高鐵洗近千億得個窿，水喉水有毒，扶手電梯會食人，拍片放上網俾人拉，差人周街打人仲可以食長糧。可惜的是這個城市這個時代謊話太多。可憐的香港人，要搵啱口型既媒體，只可以在網絡裡搵。種種既胡鬧和荒唐，成為咗100毛既靈感來源，亦為香港人爭番啖氣。城市越荒誕，100毛就越受歡迎。某程度上，這是一種可悲。
就在大家看分獎禮看得興高采烈的時候，卻突然傳來股東出售100毛股份的消息。究竟是趁高位出售，還是收到風聲跳船，我沒有資格去猜測。但是昨晚100毛老闆林日曦上台時口黑面黑，就已經令我不寒而慄。看來這幾年來香港的光怪陸離，已經令我不再對這個地方有信心，不再相信當權者會按常理辦事。
我當然希望這是我的過度悲觀。但Shell 可以變成中石油、now 亦可以變成另一個 cctvb。單車可以變摩托，但並唔代表架車唔會炒。而且，反而仲會炒得更甘。關鍵在於，我們會唔會就算洗版都繼續撐，人肉圍牆一般護住架車行。這種骨氣，才是真正的香港精神。