領展近年開始對自己嘅投資組合洗牌，向南豐、政府產業署出售資產後，就拋售部分商場資產。最近領展又委託測量師行，打算將五個公屋商場物業標售，價錢每個商場大約三至四億左右。
以領展嚟講，將商場執靚咗後，包裝出售係好正常嘅事。對股東嚟講，呢個係最有效將投放喺公屋商場翻新嘅投資套現嘅方法，特別未來經濟陰晴不定果陣，領展無乜理由要由租金收入裡面收番投資回報，特別係公屋商場嘅壽命都有番咁上下。
有啲左翼人士，指責領展出售資產。其實對堅持公屋商場必須照顧弱勢社區嘅左翼嚟講，領展出售公屋商場，唔係一個千載難逢嘅機會，俾呢班友一展抱負嘅咩？
近年潮流講社企，如果社會人士真係覺得領展嘅公屋商場一定要照顧弱勢嘅，點解中環未見有人振臂一呼成立社會企業，用市價收購領展打算出售嘅資產，然後用番原用房委會嘅政策租俾果度啲租戶？如果喺外國，一早有人接觸各大基金會做呢件事，咁用行動證明左翼嘅價值乜唔係最好。領展唔肯賣就話抵鬧，依家領展肯賣喎！
就算左翼無咁把炮，喺各大慈善基金籌集資金，經營左翼心目中的「社會企業商場」，咁左翼向政客施壓，要求政府成立基金，參與競投領展出售嘅資產，又得唔得呢？喺西方，左翼政客都會要求政府出錢買番資產，而唔係鬧領展喇。但中環客好奇怪，無人要求過政府參與投標呢堆資產。
所以中環客最慨歎，香港唔係無左翼，不過係嘴炮左翼，叫佢地有啲實際行動？係就唔會有「左膠」呢個名喇。