要說英超上週Top fit前鋒，你可能會諗起一場入4球嘅盧卡古；
提起今季英超高效嘅老將前鋒，你第一時間可能會諗起啱啱創英超史上單季入15球以上最年長球員嘅伊巴（35歲）；
講起第現役英格蘭射手，你可能會覺得講緊熱刺嘅哈利卡尼；
但觀察數據，效力護級球隊新特蘭嘅迪科爾，其實有資格與之一拼；就算未必係球迷即時諗起嘅對象，佢嘅表現絕對唔會比以上三點所提及嘅人物遜色。
34歲嘅迪科爾，上季上陣34場攻入18球（聯賽33場15球），係球隊首席射手，位列英格蘭本土射手第3位，僅次於哈利卡尼及華迪，唔好忘記迪科爾效力嘅新特蘭，上季係僅僅護級成功。
今季迪科爾依然係黑貓入球泉源。聯賽上陣24場攻入14球，同首位嘅盧卡古只有2球之差。上週迪科爾梅開二度，助新特蘭大勝水晶宮4：0，取得聯賽近7場首勝，拉近與其他護級球隊嘅距離，如此表現，難怪領隊莫耶斯看待迪科爾係球隊嘅非賣品。
17歲喺韋斯咸出道，無論後期效力樸茨茅夫定熱刺都有入球保證，「英超百球大關」早喺2011年已經達成（如今155球）。3年前，迪科爾毅然離開英超投奔美職，但半年後旋即回流英超拯救新特蘭，如今三十有四，依然老馬有火，愈打愈有，繼續喺光明球場上攻堅。
呢位沙場老將都將未必如伊巴氣勢迫人，亦未如哈利卡尼或盧卡古獲球迷看重，但迪科爾用入球證明自己，依然係英超戰場上一位出色射手。