生活

得啦!知你死老母啦!但你洗唔洗憎人快樂?

廣告
得啦!知你死老母啦!但你洗唔洗憎人快樂?

廣告

有個題目幾乎每年柳臣都要攞出黎講一次,無計,有種人隔一排就會病發。

世界上最討厭最黑人憎既人,就係憎人快樂既人。

每次睇到其他人快樂,佢就會渾身唔舒服。非要令到你都唔快樂為止。

柳臣都唔知呢個咩page黎,亦都唔係針對呢個page,因為柳臣相信佢唔係個別既例子。

柳臣觀察多年,有好一班人都係呢種心態。

你問而家政治環境係唔係惡劣,係。但係咪就代表開心變成咗一種罪惡。

每次見到有人輕輕鬆鬆開開心心,你就非要去打鳩佢一身,令到每世界都哭喪咁,你先至開心呢?

太詳細既論述唔再重覆,有興趣可以click番柳臣之前啲文黎睇:

別看輕廉價的快樂
點啊!香港係咪以後都唔可以有娛樂架啦?

柳臣無話要全世界都普世歡騰,又或者要當無咗件事。但就如你有權唔開心一樣,人地都有權開心。

正常少少,我地要打擊既係政治問題,而唔係開心。我地政治上既各種爭取,最後都係希望人開心啲姐。

你可以唔快樂,但你唔好變咗去憎人快樂。

屌人唔會令你自己變得高尚,只會令你變成痴線佬,一見到人開心就吠,於世何用?

中秋佳節,已經唔係好好天,睇唔到月亮,你俾我睇下舊膠都唔過份姐?

俾我輕鬆過幾晚得唔得?你鐘意日日開post話今日係民主最黑暗既一日係閣下既事,但唔係人人都鐘意將呢啲野掛係嘴邊。

大部份人既大部份人生,都係玩下膠講下無聊玩笑打下飛機溝下女講下去邊度食飯就一世架啦!唔係個個都係政治撚黎架!

你鐘意哀悼或抗爭全憑閣下高興,但其他鐘意過自己生活,鐘意睇膠既人,你冇必要殺無赦吓話?

如果係咁,你同何君堯有咩分別?

就正如開口埋口提自己死老母唔代表你關心老母,下下搵位都去講政治唔代表你關心政治。

得啦!得啦!知你死老母啦!洗唔洗頒個關心政治獎俾你?

但你洗唔洗憎人快樂?人地開心邊度得罪你?

廣告