1. Kobe給你的印象？
96梯隊中，由一開始就最愛Allen Iverson，起初覺得Kobe係另一個「死仔」，但幾年後已知他非池中物，不過對其好感欠奉；加上馬刺躉關係，一直討厭湖人球員。03年外訪見到Kobe，覺得佢公關手腕一流，相比後來冒起的LBJ，Kobe係一個完美的公關。之後幾次訪問佢，每次都令人滿意，既好人，又有soundbite，而以NBA球星來說，絕對係頭幾名的採訪對象。記得11年在紐約，有個女行家大叫了一聲Kobe，本來距離幾十米的Kobe聞聲，竟然走過來與她擁抱，然後和我們逐一推手和合照，親和力無與倫比，不過對住工作人員就是另一回事了。
2. 有沒有覺得他故意學足MJ？
其實每一個九十年代的籃球員，不多不少也會受MJ影響，正如上一代會睇Dr.J一樣，但去到後期，你會見到Kobe對框的進攻招數超越了MJ（MJ背框的進攻無敵），單在得分技巧方面，Kobe係最接近的一個。而我覺得最似的地方係兩人都超級不服輸，所以不止要贏，仲要贏到對手體無完膚，所以進攻防守都咁犀利。
3. 最喜歡Kobe那個綽號？
Kobe這個名字很易記，所以大家都就咁叫Kobe，因為其髮型，香港都好多人叫佢爆炸頭，有段時間講波佬會叫小飛俠，到Nike幫佢設計咗Black Mamba，非常成功，先正式成為其綽號。我反而喜歡港台的朋友叫他做老大，簡單易明，又有霸氣。
4. 有沒有買過Kobe的產品？
波衫，一件都冇。但波鞋就好多，由adidas的KB 8開始，到之後的The Kobe，買過幾代；到他加盟Nike後，全部都有買。最愛是2005-06推出的Zoom Kobe 1明星賽色，因為着住呢對鞋，在波特蘭Nike總部贏左三人賽冠軍。Kobe後期的籃球鞋幾乎全部低筒，方便後衛，亦未試過拗柴，好好着。2013年Nike幫Kobe 推出Kobe prelude pack，一套八對都令人愛不釋手，而本地宣傳找了喬靖夫寫籃球小說，配以馮展鵬的插畫，亦令人難忘。
不過而家回顧Kobe的波鞋，最難忘可能係The Kobe，唔明當年的設計師點樣由Audi變成一個箱般的籃球鞋。呢對鞋我係佐敦大大步買，盛惠299蚊，抵到爛。
https://solecollector.com/news/2014/08/the-history-of-kobe-bryant-s-signature-sneakers1
5. Kobe最難忘的比賽？
諗左好耐，最後都係揀佢最後一戰。雖然對速龍的81分之戰好震撼，但點都唔夠睇最後一場咁經典。記得賽前一晚，用左三個鐘寫《再見了，最偉大的反派》，寫左兩萬幾字，最後刪左好多，餘下一部份諗住睇完比賽先完成。誰知Kobe竟然入足60分，記得第三節尾，有個鏡頭見到佢喘晒氣，但之後落場又再沒事人般狂轟。最後與他打賭的O’Neal也只能苦笑服輸。我看完比賽，激動萬分，因為身在公司，只能扮出若無其事，開完會後，邊為《再》文寫下結尾，幾次不由自主掉淚。至今，這仍是自己最滿意的文章。
同日NBA煞科，勇士打破公牛紀錄，締結73勝，但在Kobe威力之下，都只能放在版面一角，難阻Kobe最後一戰成為當日頭條。
6. 8號定24號？
24。8其實好模糊，就算有入樽賽、81分同三次總冠軍，始終都係二佬，去到24號，慢慢先做了湖人一哥，最後與塞爾特人的總決賽，更加係黃綠之戰經典對決之一。24號的Kobe面對更多困難，面對重創，也面對失落季後賽，可是一一克服，這份毅力令24號更加有價值。
7. Kobe最型的事？
不是他那句count to five，也不是絕殺或者入幾多分的比賽；而是他每次主場出戰，都是坐直昇機到湖人主場。世上年薪千萬的球星多的是，全部都有無數靚車，但我未聽過有誰能夠霸氣到坐直昇機去比賽。另一件也是非常有型的事，就是為宣傳Hyperdunk，他在廣告中「跳」過了急速衝來的Aston Martin。借位也好，合成也好，但第一次看到這廣告，的確是大大聲嘩出來。
8. Kobe在你心目中排名第幾？
對不起，我對Kobe的感情，可能是因自己成長和工作生涯，和他剛好掛勾，可是在籃球場上，他肯定不是我的頭號偶像；最愛的始終是TD、AI、MJ和Pippen。可是我得承認，我由一個Hater變成支持者，中間就是被其毅力和霸氣折服。當今已沒有那位球星能夠如「老大」般目空一切，冷對蒼生了。除了性格，我更懷念其「技術」和「步法」，那肯定是無數次清晨4點鐘起床苦練的成果。當今三分成為主流，團隊打法及球的流動才是王道，不論背籃單打或個人正面進攻，都變得不合時宜；Black Mamba的利牙昔日見血封喉，今日已難有傳人。