近來不時聽到甚麼幾年加入幾十個會員，語帶暗示咁，然後執委請辭又有人追殺，故為年青朋友寫一點記錄，趁還有記憶就守住，免得被遺忘、被扭曲污衊。
有個數學友，拉架買餸車屯門通街走，車仔裝滿直幡、單張等等，開一人站派單張，那年二零一六，街工參選人有阿達和白頭。
有文研／BBA友，賣旗翌日驚見葵芳地上黏了很多街工貼紙（太輕飛落地），一來予人觀感不好，二來團體LOGO遍地踩？就蹲在地上，徒手逐張逐張貼紙搣甩，搣成粒幾鐘，有街坊睇唔過眼叫佢哋買個鏟。
有個社福友，籌劃五一遊行時提出不如搞五一社區公投啦？！我們一堆會員就滾動友好逾百人，扣政制民生落社區，在葵青區留下無數腳毛，佢Chur到最後幾日發高燒，仍堅持打完場仗到底。
有個索女救生員，想天水圍都加開社區公投票站，但知我哋人手不足，就拍心口承包四個票站全日人手，動員力極強。超容易情緒激動，七一佔中預演嗰晚，無啦啦聽到有條友喊到劏豬咁，原來係佢.....但街工有咩爭拗呢？就通常相拗唔好口，和事佬格。
有個CS友，不但幫社區公投極速寫一個電子實時投票程式出來，誤差率低至0.22%，後來更自買server自製電子個案紀錄表，把街工科技推前一個世紀。呢條友夏天打邊爐飲暖水，仲係街工控煙辦。
有個勞模友，仲讀緊書無乜錢時，見勞工組某同事好窮成日無錢食飯咁，就經常自掏荷包請佢食嘢，又常通頂聽該同事講街工歷史及通頂同佢改歌仔自唱自錄音，仲話畢業後要十一奉獻月捐勞工組。
有個中文友，課餘教屋邨少數族裔小朋友，畢業後又業餘做工人文學獎籌委會，進修人類學又學以致用落社區考察暨落手落腳的屋邨工作。書生得嚟，赤腳遊行又得喎，那年赤腳高呼「工作供養我夢想，不是供養地產商 」走完七一遊行。街工控煙辦X2。
有個教會友，人緣第一，全個街工最左至最右，咩性格都好，他都友善相待，人前人後從不出惡言，所有部門需要他的幫助，都願意出心出力，好認真學習和實踐勞工工作使命。好可惜人生錯落喺麥記同梳化上......
有個鍵戰友，深感街工文宣太弱，不但幫手造圖，還送自己啲PPT範式方便同事改圖用，閒時留意到街工啲Posts有咩離晒譜的字體/顏色/構圖問題，也會溫馨搵示。為人消息靈通又思路清晰，對基層運動好有心。
有個CD友，有社福機構唔做，因為業餘參與不足，想進入埋職員系統了解和協助團體，就減幾K人工來街工做，又係啲幫拖幫到Over晒，明明淆淆地都頂硬上，責任先於能力嗰類人。心地極善良，可以頒個最善良女主角奬俾佢。
有個思哲友，同街工總是那麼遠這麼近，街工啲讀書會成日馬克思甚麼的，同佢本身啲取向和讀書方式又未必相投，覺得街工啲嘢係有意義，但操作上要點樣做、點做得更好，總係講得出但可惜無得介入，但係仍然搵自己位置去踢好街工場波。
有個佛友，性本愛丘山，只係多年前喺街工實習過，近年聽聞需要援手，就盡做，需要打會紀就打會紀，需要籌款就籌款，需要晨早落區就晨早起身，需要參加讀書會就讀書，需要遊行就上街，額頭印咗「國家有咩任務俾我？」咁。
有個物理友，中學時代同同學仔整咗個亞洲第二大人手自製望遠鏡，近期發現「解散勞工組事件」有可疑，馬上展開調查、整理好一個懶人包，並認為做到這個程度才是合格的勞工團體會員，為人恩怨分明，斬人不留手但好有理據。
有個波友，喺龍和道俾人屈過襲警，政治光譜其實唔係咁街工，但需要幫拖既時候，文宣、踢波、影相、行動都會認真幫手。好有自己一套想法，但無乜Chur街工要變到點點點。其實這也是遺憾，街工若能作出更理想的吸納，必在運動上有更好的發展。
還未寫完，實在太多事值得記下，呢排要早啲瞓，仲有些人好想寫但過幾日先。