立即捐款

陳劍青

本土研究社成員,經營民間地理思想,關注城市空間問題。 網誌

政經

【倫敦直送】英檔解密:振英是個人才

【倫敦直送】英檔解密:振英是個人才
廣告

廣告

其實真係冇乜特別新聞同歷史研究價值,又唔算一件重要事黎,但係在整理解密檔案既過程中,初次搵到比較多篇幅咁解密到梁振英(Leung Chun Ying)既報告,我諗應該好多香港人想知檔案裡面講乜。

01

嗱,事先聲明,唔好一開始就覺得英國公開解密檔案就係想爆你大獲然後就出律師信告人,人地係剛剛夠期依法解封,反而其實今次檔案裡面英方係讚到CY既人品幾咁令人刮目相看,正到好似一隻漆黑中既營火蟲咁款。

解密檔案紀錄當年曾任中英聯絡小組的英方代表A R. Paul,92年初曾與梁振英一齊食點心,向外交部Peter Ricketts 及Charles Garrett提及,梁振英喺英方眼中表現得係一個個子高(tall)、帶有一種令人印象深刻既優雅形象(impressively elegant figure)、講得一口流利英文、有一定個人魅人(personal charm),同埋係個好有技巧既溝通者(語言偽術?)。同時檔案寫到,因為佢既底子「夠香港」,呢種人啱哂個陣北京口味(Peking's favour),前途真係一片光明。

02

唔單只係條「上等京菜」,檔案當面重寫左一堆可圈可點既手寫字,回覆同梁振英見面後既報告,指英方同佢既關係「幾值得培養」(well worth cultivating)。(嘩,個陣有冇食兩家茶禮先?)當然,究竟英方進一步既行動係要扶植佢、同佢繼續建立朋友之間既友誼、定係點呢?檔案裡面就冇進一步既透露,但就話佢係遊英常客,兩個月後佢去英國個陣英國外交部既官員應該去認識下咁,檔案亦再冇交代下聞。

其實CY好彩上位得早,依家好似啲政治人物去外國做下呢類國際連結,同外國人交流下意見,就會動不動俾人話係勾結外國勢力,條紅線標準已經唔同哂。

03

檔案都有透露,其實年僅37歲既梁振英個陣已經迅速自組緊個「梁營」 (base),明顯得看出佢有政治生涯計劃,亦估計佢喺幾年之後就會嶄露頭角。檔案覆述佢都話初頭以為中方搵佢做基本法草委,佢都以為想搵佢做下收信打雜 (post box),點知國家係有更大既任務俾佢,呢句就唔知係唔係真心話。

04

講左咁多,當年英方代表就預視佢日後「必成大器」,甚至已經覺得佢「已經具備所有做未來特首的條件」(all the attributes of a future Chief Executive of Hong Kong SAR)。點知又真係俾佢買馬貼中,最後做左第3任香港特首,依家重榮升國家領導人直情變左「國之大器」,除左恭喜梁生之外,都不得不讚嘆英方既對未來既判斷力。

從檔案裡面紀錄既對談,亦已經反映左梁振英兩種一早就種落既價值觀:

1. 佢認為中港矛盾既主因,責任係喺香港人既偏見態度上。佢批評香港人睇唔起大陸人,成日當佢地粗鄙、大動作既「阿燦」(Ah Chaan),可見佢在任特首個陣成日講既「中港包容論」,呢種「顧全大陸」既想法已經在90年代一早成形。

2. 個陣佢已經覺得立法會好政治化好多政治爭拗,影響左香港既有效運作(咦,今日唔知係邊個成日挑起啲政治爭拗先呢?)就此政府應該要更有威權(reassert its authority),同埋去簡化個(民主)程序(streamline the system)。(今日立法會既監察權又真係被streamline左......)

05

其實如果呢份檔案早5-6年公開,香港人就唔駛等佢上台做特首先知道佢呢啲價值觀,但這一切都來得太遲。睇到今日梁振英對FCC個英國記者咁樣趕盡殺絕法,重係咪好似檔案中描述中咁謙謙君子,真係好值得英方重新估計,普通香港市民就真係心裡有數。

PS: 特別鳴謝倫敦檔案挖掘小組,加油!

廣告