五月底，立法會宴請外國領事，有份出席的梁美芬原來識讀心術，單睇赴宴者眉頭眼額，便知佢地希望有關修例能順利審議，可能比佢地肚裡條蟲知得更多。
更加絕嘅係，撐政府無極限的芬姨，原本乜野核突理由，都可以輕易講出口，點知一個屈尾十，居然走去電台話自己「用咗好大嘅努力先爭取到橄欖枝」，仲接觸過前線的勇武派，最終「成功爭取」林鄭撤回修例，令網民大跌眼鏡。真係一直錯怪左佢囉！大家而家先知芬姨咁「用心良苦」，咁為對家著想，不禁開始為佢擔心。
原來佢先係大台，係呢場逆權運動的幕後黑手啊！背後佢同中共口中的外國勢力有無景轟，外人不得而知，但佢對人說人話，對鬼講鬼話，兩面三刀，點到主事者陀陀擰，搞到政府頭都大，累到元朗白衫軍、北角福建幫和荃灣藍衣刀手雞毛鴨血，就毋庸置疑。
林鄭撤回修例，已經被藍絲鬧佢跪低鬧到飛起，梁美芬今舖，顯然為了選票考慮（等於話反送中係主流民意，連佢支持者的基本盤中都有不少人對政府修例深感不滿，佢權衡輕重後才改口，扮站在廣大市民的一邊），變相話自己係無間道。唔係仲衰，即係話自己棄暗投明，即係話支持政府者和撐警藍絲係社會的少數，道理亦不在佢地果邊。芬姨仲不特止，仲要向警隊恨之入骨的勇武派示好，等於重重摑有參加撐警集會果16.5萬的人一大巴。如果你一直義無反顧咁撐政府，見到人咁反骨，又點可以吞得下呢口烏氣呢？
好人一生平安，同意請分享！