新一屆區議會開鑼，18區嘅區議員都要面對增選委員嘅廢存了。
日前有媒體訪問過我，我立場好清楚，就係要取消增選委員。
我認為，民選議會裡面，民意代表係果班就果班，唔好加其他嘢落去，搞到有僭建成份。此為最大原則。
增選委員設立嘅理由，係在區議會裡面增加顧問。
18區區議會增選委員制度各有不同：
我老家灣仔，每個區議員可以推舉一名增選委員，增選委員冇投票權。
東區區議會最衰，增選委員由全體區議員投票選出，在以往民主派 10 席 VS 建制25席嘅時代，所有增選委員都係建制嘅人，增選委員仲有權投票，令建制派更牢固地控制所有委員會，而且可以培養佢哋嘅地區人馬，去參選區議會。
而家區議會變天，各區區議員普遍認為，增選委員唔應該有投票權，但就認為未必一定要廢除增選委員，同我要廢除嘅意見好唔同。為此，有其他區議員跨越18區搵我討論。
其實立法會、區議會，都應該就住各項不同事務，邀請專家、顧問、持份者俾意見，一鋪還一鋪，次次清。
而增選委員一做做兩年，佢冇可能係萬能專家，
冇可能集藝術、環保、青少年、反圍標、安老、電競、盂蘭節、唱大戲、科幻、乜乜物物……專家資格於一身。
而環顧多年以來，各區增選委員，其實唔係某專業範疇專家資格，而主要係社區工作者、居民之類。佢哋作為「專職地區工作者 / 關注社區嘅居民」，作為兩年任期嘅增選委員，仲說得過去。
我自己就曾任灣仔區議會增選委員，自問都係「關注社區嘅居民」，
但列席過一、兩次會議就冇再參與了，
因為返心諗，咁樣去做「社區顧問」都係怪怪......
有意見認為，
做增選委員，有個名份，加上多啲歷練，第日政治資本多啲，容易當選。
在建制圈內，可能係，因為排資論輩，在國家機器內要有名有份；
在民主陣營，唔係，支持民主嘅市民會問：
「增選委員」？乜嚟架？你做過乜？邊個俾你入區議會架？
試問民主陣營之中，有幾多個當選區議員，真係同做增選委員有好大關係呢?
區議會變天，有意見話，民主人士做增選委員，可以易啲當選。
我認為唔係囉，反而就留咗個理由，俾僭建制度延續落去。
就算話, 而家增選委員不受薪, 又冇投票權，但其代表性都不及選舉投票產生嘅民意代表。
我當然明白社區中要講人脈，仲有錯綜複雜嘅關係，民主陣營想利用增選委員，在未來取得更多區議會議席，都可以理解。
我唔會攻擊接受冇投票權增選委員嘅民主人士，就係循住呢個道理：
民主陣營利用功能組別參選立法會，都係為咗有一日有全面普選，
而唔係令功能組別千秋萬世。
有人話，民主派爭取到功能組別過半就唔會再叫取消，大家都引以為誡呀。