呢幾日最嬲嘅係聽到林鄭其中一番言論係指特區政府防疫有幾進步，由九個關口封到得三個（2月4日凌晨開始）。佢用左成20分鐘嘅記者會發言都係圍繞住呢個重點（今日又話2月8 向內地入境者實施強制檢疫），其實邏輯同歷任政府之前建屋、發展某某產業等等，都係要一步步黎，然後每一次最重要就係有靚仔嘅數字話比人知改善左幾多幾多，好似今次話比人知人流量可以減少幾多。如果係咁，當然最好緊係慢慢黎，分四次做五次做，咁就每次都有進步，之後再喺記者會拎出黎讚揚下政府嘅措施。呢種講法亦中哂一班親中人士「中國同香港係有問題，但係都要俾人一步步去改進」嘅口吻。
其實你諗真啲，真係好荒謬。一來今次嘅疫情唔可以一步步去做，我哋唔係要一點一滴嘅改善，損失一條人命都嫌多啊！仲要明明防疫工作係有能力做得更多，唔同其他社會問題有結構有歷史有權力嘅因素要一步步改，簡單啲講，就係政府肯做，就會做到啊你明唔明姐！
二來，病毒呢樣嘢係會以幾何級數增長，呢個道理小學有讀過常識科嘅都會明白。所以唔係話截咗一個帶菌者入境，本地受感染嘅人口就會減一；重點係帶菌者會唔會活躍喺社區同人多嘅地方，佢一個人可以傳比一個，都可以傳比一百個。換言之，政府自豪嘅入境人流減少，同最終社區爆發有幾嚴峻，係無必然關係。只要唔封關，香港嘅醫療系統崩潰係容易推測嘅現象。
三來，請大家代入，如果你有武漢肺炎，知道香港醫療先進而好想黎香港醫，跟著會唔會因為封咗羅湖或者皇崗等幾個關口你就會放棄而唔黎？我估你坐飛機，買幾貴機票都會過黎。你仲會睇中機場係香港國際客運嘅命脈，賭政府點都唔敢封關而安心過黎啦！另外，香港政府係呢場疫症完完全全顯示對「自由市場」嘅盲目追求，除左對於炒口罩政府無動於衷，向外來求醫者收醫療費亦可以見到，其實政府係唔反對內地人來求醫，最重要啲人比得起錢，就係市場上最有效率嘅分配。如今，關口封啲唔封啲其實都係同一個道理。佢深信，做任何事政府「積極不干預」嘅態度係皇道，問題係，好明顯而家呢套管理哲學同意識形態係唔掂嘛！如果我地同政府嗌數，除左講理道之外，要佢正面地認清番呢套意識形態嘅失敗之處都係好重要。