題為編輯所擬，原題為【剛烈與溫吞，我嘅選擇……】。
講明先，無論大家點睇街工參與初選呢件事，都唔足以要我承受退會嘅成本，亦唔足以將我推入咁大嘅掙扎裏面，而我對議員身份嘅期望、議辦嘅現況亦只有同事同最親近嘅人先會明。唯一令我有以下想法同決定嘅，係我對從政者嘅基本要求。
1. 我對「街工參與民主派初選」嘅睇法
過去半年已分別向街工會員、執委及梁耀忠說明全盤想法，亦曾對部份天水圍區議員透露一二，簡列如下：
a. 我唔會參與任何有關2020立法會選舉嘅工作或為任何參選人背書，無論係街工抑或任何政治團體；
b. 我唔同意街工派人參選2020立法會選舉；
c. 我唔同意梁耀忠參選2020立法會選舉；
d. 若街工或梁耀忠堅持參選2020立法會，應參與民主派初選，並接受初選協議。
頭三點係我對香港政治嘅判斷，最後一點係我對民主派從政者嘅基本要求，原因不贅。
從政如做人，選舉就係競爭，一就一二就二，贏就贏輸就輸，初選完比人DQ晒焗住再諗辦法係一回事，但無一種選舉容許事先決定「初選後再議」。2020年6月19日，街工記招上，四名會員宣佈代表街工參與民主派初選，但唔保證遵守初選結果，猶如事先講明「我會彈弓手」，係純粹嘅利益計算，置協議於不顧。
街工要答嘅問題只有一個：初選輸左會唔會退選？會，或唔會，無第三個選項，除非唔參與初選。一切解釋說明都係多9餘，唔好對同路人耍官腔玩弄修辭，除非唔當大家係同路人。
2. 我嘅決定
a. 退出街工
b. 唔再借用街工喺天水圍嘅辦事處， 一個月內歸還借用嘅辦公空間同設備
3. 希望大家諒解
街工可以失去我而無損失，但我離開街工將失去一啲地區工作嘅關鍵資源，呢啲資源唔係一句「支持你退會」就可以彌補到。喺原則同工作成效之間，我選擇原則，代表要放棄部份短期內可望達成嘅目標。
希望大家諒解，我地議辦將會變成真正嘅無殻蝸牛；
希望大家諒解，我們嘅支出會更大，資金將更加緊拙；
希望大家諒解，一啲原定2-3個月內推出嘅計劃會押後。
4. 必須向議辦同事講
喺你地有日頂我唔順想辭職前，我地會繼續係同事，一個都唔會少，不過工作環境惡劣好多，辛苦你地喇。
5. 厚住臉皮同天耀街坊講
有錢出錢，有力出力呀唔該。我地議辦5條友要革新區議員同社區，冇左你地一班街坊唔成事架，除非淨係想我地做傳統區佬啦。
#天耀 #區議員 #何惠彬