港大通識在今個暑假搞了一個香港後樂園的series，今日（6月30日）的行程是關於西九龍的。在地鐵九龍站D1出口集合時，帶隊的梁款說，今日的行程係來睇樓的，呢度除了工友外，最多的就係實Q。果然，一行出地鐵站，我地除了工友外，見到的就係實Q，當然還有幾碌陽具，又稱神主牌，名曰：漾日居、君臨天下、凱旋門。作為勤力好學又八卦的同學，睇樓考察又自然會影下相。當同學仔拿起相機的時候，實Q哥哥就會行過來干涉，同你講呢度係私人地方，唔影得相。我們一行未滿30人（據梁款說，是29人，剛剛唔會畀警察叔叔「關心」），基本上行到邊實Q就睇到邊，梁款原本打算帶同學仔行去陽台邊邊，遙望西九邊緣的時候，三步一個的實Q哥哥就行過來同我地講，呢度係私人地方，係唔畀行的。咁我有個同學仔就當然問下佢，其實邊D地方係私人地方。個實Q哥哥就好誠實咁話，其實你地出左地鐵站那條路已經係私人地方，所以你地已經侵入左私人範圍。
一行唔夠30人返到地鐵站，梁款話，今日我地雖然睇唔到西九塊地皮，但係我地學識左一樣野，咩叫公同私。睇睇下，其實九龍站D1出口可以話香港的地鐵站出口罕見的有自動門，而你行埋去睇部lift，你會見到lift的顯示係5樓－－D1出口、漾日居、君臨天下、凱旋門，真係認真少見，地鐵部lift唔係只係顯示出口名稱的嗎？
結論係：其實九龍站D1出口都係私家的，如果你唔係住在漾日居、君臨天下、凱旋門，或去探訪，不得使用，D1出口其實係豪宅大堂入口，所以有同學仔建議那裡應該棟一個實Q，或者一個實Q counter，再唔係就寫住「九龍站D1出口，（賤民）不准使用」。
行返落去九龍站裡面，奇怪的係地鐵站裡面的路牌指示D1出口可以去到西隧巴士站，咁那個巴士站係唔係專用的呢？
當旅遊巴士駛經九龍站地下的停車場，我們看見很大的地下（車）城，原來那裡係漾日居、君臨天下、凱旋門的私家停車場，於是有同學仔作出修正，D1出口只係畀漾日居、君臨天下、凱旋門的傭工買完野回家中，其他閒雜人等，不得使用。