我是一個活了二十五年既「港男」，如果…我意思係如果，以「星期日檔案」裡面港女黎潔螢對「無用港男」既標準黎睇，我會係比起果個「月入$8000」既John更加無用兼廢柴既男人。
點解？中五畢業，又係「零蛋部隊」，番過既工從來都無超過8千蚊一個月，甚至曾經番過4千蚊既工，仲捱過好耐時間。今日又失業超過三個月，如果照「毒男計分表」黎講，我係中左三個。
我唸有人會認為，4千蚊既工同羅綜緩差不多吧，其實我真係唸過差一點就想去羅綜緩，但唸下唸下因為一個人羅得二千幾蚊，斷唔夠新來港移民四個人羅得多，都係做野好過了。
由畢業開始，靚仔一名，乜野經驗都無，記得試過做大家樂，不過一日就走了，做過倉務員又一日被人炒，後來記得果年剛推行「展翅計劃」，我又讀過，結果呢？一千蚊既培訓津貼都唔夠貼車腳，仲要被人留難，差一點連1千羅唔到。輾轉輾轉，又讀過中華廚藝學院，唸住想做後鑊點知畢業前又撞正911經濟插水，加上…果陣我都係唸住「dum」時間同入去溝女之嘛…最後卒之連工都無去搵，輾轉做過短暫既「隱蔽生活」，後來覺得無錢實在太辛苦，又唔想見到阿媽日日比面色，於是又走去做保安，但又係做唔夠兩日，試問十二個鐘無野做既時間點過呀？當然，又試做「雙失青年」。點知到左果年8月，政府搞左個「青見計劃」，我又去碰下運氣，卒之搵到個「青年大使」黎做，4千蚊一個月，記得果陣搵4千蚊對我黎講，已經係一個好好既待遇了！點知呢種工作只係得短短6個月時間，所謂光陰似箭，約滿後又失業了，但對於我黎講，「青見」可謂對於我呢種人，或多或少會起到「救生艇」既作用。無他，呢d所謂「見習」工作對於我地呢d社會底層既人，都算係個比自己碰運氣既機會，相比大學生，我地既競爭能力低，議價能力又低，唔用呢種方法搵野做，如果去乜野勞工處就業中心日日搵工，又係見住班「長渣綜緩人士」、甚至係搵工搵到shot左既精神病患者響度「打等」，我以前試過，所以唔想同佢地一樣呀！於是，於是響幾年間，我間接透過「青見」裡面搵過唔少工作想碰碰機會，但係，正因為呢d工都係「見習」身份，所以我人工其實都無乜點高過，4千、5千、6千……最高試過搵6千…算叫做我比較「風光」既時間，不過生活仍舊「猛猛緊」，比左一d阿媽，除剩坐車食飯，戶口所餘無幾。
後來，廿四歲過左，代表唔能夠參加青見計劃，剛好碰上之前份工又因為經濟差無得做，於是我又要獨立起黎去勞工處搵工，輾轉間去到今日已經有幾個月，send十份cv無一份肯in都算，最近果個乜野「大學生實習計劃」又將大學生人工定做乜乜四千蚊…我響度唸，佢地「實習」都要捱4千，咁我地呢班人既價值又有幾多錢？
眼見銀行剩下來既錢已經唔多，開始有騎牛搵馬既思想，但當我唸起做保安、或者乜野都去做果陣，咁我第日既cv會點呢？第日見文職工作，老板睇到呢張花碌碌既cv，又會點睇我呢？老一代話「騎牛搵馬」，老實講，如果今日香港仲有工廠，可以「靠雙手」搵食的話，我唸我都會去做羅（唔辛苦的話），但今日既環境，仲有呢種機會咪？
唸住去打劫又無膽做，文又唔得，武又唔得，不如做網吧算數啦，反正鐘意打機，又係個「羅底橙」，反正我呢類人想成家立業都成問題，或者無咁多野去唸，來個「自娛自樂」，落得清閒，可能無咁大壓力。
但係…細心唸一下，唔通我既人生又想咁過嘛？書到用時方恨少，今日我後悔自己以前唔好好讀書，好想重新進修，考過會考，但屋企老豆老母退休了，唔通我又乜都唔做攤大手板嘛？就算半工讀，但以我既學歷根本無可能搵朝九晚五既工，又可以嘛？再講兼職就係好辛苦，又點讀書呢？
唉，今日既我仲係乜野都無，到底係我地呢一班人注定係呢個世界既負資產？定係上帝同我開左呢個咁大既玩笑，要我響呢個世界受苦？
（完）
注：本篇部份內容為借用本人曾經所見所聞，將之集合一起成為本篇「狗up」文章，可謂純屬虛構，如有巧合之處，敬希一笑置之。希望借此讓各位朋友暸解到，呢班15-2x歲、無大學學歷、低技能既青年內心世界。
BobbyDeal