是日與友人於吉野家就餐，見到一名年約五十既的女侍應因爲在與客人在溝通上出了小問題而被另一名旁觀而正義的女青年投訴，而接受投書信的領班代爲道歉，並指“佢其實唔係幾識表達”。
首先事件發生前我就已經留意到該名侍應講野粗聲粗氣，比人一種“唔好激嬲我”既感覺，但觀察落又發覺佢原來做野又好認真踏實喔，雖然手腳較慢。其實我都會認為佢個人好可能確實不太懂得表達自己，係幫我地開爐既時候基本冇講野，聽佢講最多就係“唔該借過”，更多時候在埋頭苦幹。嚴格黎講確實無服務可言，但問題你係吉野家食飯，埋單唔需要加一。
即使我同意該侍應服務態度有所欠缺，但工作態度認真，遠未至於被投訴既地步。而且係由一名不關事既女子“提告”，呢度我唔想講“關妳L事”，而想問“有冇必要”？佢係一個咁大年紀依然需要在餐廳做最底層工作既婦女，假如工作能力真是高的話，會係呢個位？大家都係勞苦大眾，為左份工，為左d錢，為什麼不能多d尊重同包容？雖然佢講野好似好串，但卻是又合乎情理，因同佢工作職責相符。而爲什麼該名不關事的女子會“正義”出手，是否因為越缺少自我價值越敏感越需要強調翻自我尊嚴？無從得知，同時亦令我諗翻自己既一個經歷。
之前陪朋友去百腦匯問相機，個sales好犀利，咄咄逼人，問完我個朋友想再諗諗。佢即刻黎個必殺“點啊咁要咩色？有兩隻色既喔？金色同銀色@#&€⋯”朋友婉拒想離開，然後佢就爆pow“仲睇？睇乜野啊睇？出面成三十幾度，仲帶住條女係出面行，我係你都唔好意思啦”，我見朋友都要爆發了，即刻拉佢走。朋友都想投訴佢，其實會嬲都人之常情，但最後我都係阻止左。一係百腦匯服務態度差早有聽聞，二係作為一個sales食傭，需要講求服務態度佢唔可能會唔知，最後講得出咁既野我諗佢都係出於經濟壓力生活所逼。
大家係香港生活都唔容易，呢種情況其實先更加需要對陌生人更多尊重更多理解，而唔係把握任何機會將自身不愉快發洩於他人，畢竟造就我們生活咁難開心咁冇未來既唔係呢個侍應，唔係呢個sales，而係呢個大既社會經濟體制。正義從來不是通過打壓同樣弱勢而勤奮的他人而得到伸張，尊嚴亦不是緊緊抱擁就能捍衛。