問題
1. 現時好多被捕義士因為法律程序或被捕身份搞到手停口停，基金現時只係得一次性緊急經濟援助可以幫到手，但 800 位被捕者中只有 55 人申請，而且每人平均只有 $10,000 左右，但仍然聽到好多被捕義士經濟有困難需要援助，佢地亦反映好難由 6.12 拎錢，而且大家亦相信一次性援助 $10,000 絕對係唔夠。
2. 基金預留大量金錢比法律訴訟之用，但人道支援同經濟支援因被捕影響生計既義士亦同樣重要。而預留大筆資金亦令義士得唔到急切經濟上既支援，而且錢用後亦可再捐，現時巨額餘額亦會減低市民捐款意欲。
3. 基金有冇需要留咁多錢比法律訴訟？
基金首先可要求義士必需先申請法援去盡量先利用公共資源。而法律開支預算亦可參考當年 13+3 基金，13+3 基金於 17-18 年度用左 85 萬係法律支援上，即平均 $53,000 一個人（因為有法援既人可以完全唔洗資助或只需少量分擔費），咁假設 6.12 至今 800 位被捕者就需要 4 千萬左右預留做法律開支。由此可見基金仍有4千萬左右可用於其他人道支援上。而且都係果句，錢用左可以再捐。
建議
1. 盡快設立每月經濟支援給予有需要的被捕義士，經濟支援由被捕一刻至到法律程序完結或監禁完結才停止發放。而每月支援既金額可以再研究，可以視乎義士在經濟上所照顧的人數而定。而且申請手續要盡量精簡，基本上只要因反送中被捕的示威者都有權申請。對負較重刑責而選擇流亡海外既義士基金亦應提供支援。
2. 2016 年旺角警民衝突已經有五十多位義士身陷囹圄和有三位義士流亡海外，佢地當中亦有很多人因監禁而出現經濟困難。旺角案中既義士是幫助香港抵抗暴政同警暴既同路人，建議基金可將旺角義士納入基金幫助範圍。
最後，被捕義士已經為香港押上左前途甚至性命，提供每月經濟支援比有需要既義士絕對係刻不容緩，以減輕義士面對法律刑責下承受既巨大壓力，亦係我地可以最直接幫到義士既方法。
某一位義士戶口得返 21 蚊既慘況，相信八百多位被捕者中有好多人都因手停口停面對緊經濟困境，好需要大家幫手。
13+3 基金關於法律支援開支查詢，85 萬已經係新界東北案同進入公民廣場案所涉及的絕大部分法律支援開支，由此可見預留 $50,000 一位做法律支援係一個好既估算。
參考資料：
1. 13+3 基金 17-18 年報告
2. 6.12 基金最新報告