雖然阿富汗超級聯賽有阿富汗知名電訊供應商Roshan贊助，亦有電視及網上高清直播，門面包裝功夫亦做得幾好，甚至比唔少南亞國家更似樣，但阿富汗超級聯賽同一般國家地區嘅官方足球聯賽唔同嘅就係唔係踢雙循環賽制而係分組兼踢單循環，成個聯賽一個月多少少就踢完，相信都係全世界賽期最短嘅官方足球聯賽，如果小組中未能出線，咁樣就只有三場賽事可以踢。
因為比賽太少，本土球員得唔到幾多鍛練，因此影響本土球員入選國家隊嘅機會，呢個聯賽太迷你，講白啲更似一個小盃賽，究竟幾時先會有一個似樣少少，可以同世界接軌嘅職業足球聯賽出現？
只要阿富汗有真正和平嘅一日，阿富汗足球就會有真正變革嘅一日。即係冇人知到幾時。今年阿富汗超級聯賽繼續喺首都喀布爾舉行，雖然喀布爾已經比塔利班政權管治時自由得多，但社會依然動盪，週不時有炸彈攻擊，塔利班仍然會突襲政府軍，因為呢個原因好多企業都唔敢畀錢支持阿富汗超級聯賽，怕會血本無歸，而因為動盪持續，所以聯賽只可以盡量縮短嚟搞。
不過點解咁危險要搞呢？BBC早前訪問過阿富汗超級聯賽其中一位創辦人 Chris McDonald，佢話：「這是艱難的五年，不過同時這段歲月也十分偉大」、「足球在這裡已經變得越來越有激情」、「它給人們帶來了很多快樂和幸福，而這也是我們要堅持下去做的事」。確實喺阿富汗你每日都有可能同死神距離好接近，戰亂為阿富汗人帶嚟痛苦及不安，但阿富汗超級聯賽開波後，由網上直播中睇見入場嘅球迷都非常開心及投入，呢個時候我都明白點解要搞落去。